Untitled Document

मन्त्रीपरिषद् बैठकले गर्यो ९ महत्वपूर्ण निर्णय : नेपाल टेलिभिजनको अध्यक्षमा विष्ट र रासस अध्यक्षमा अधिकारी नियुक्त ( निर्णयसहित )

काठमाडौ, ३१ जेठ

मन्त्रीपरिषद्को आज बसेको बैठकले ९ महत्वपूर्ण निर्णय गरेको छ । बैठकले सरकारले संघीय संसदको संयुक्त बैठक र संयुक्त समिति कार्यसञ्चालन नियमावली २०७५ पारित गर्न असार २० गते दुबै सदनको संयुक्त बैठक बोलाउने निर्णय गरेको छ ।

बैठकले संघीय संसदको संयुक्त बैठकले प्रयोजनका लागि संघीय संसदको दुबै सदनको संयुक्त बैठक असार २० गते अपराह्न ४ बजे अन्तर्राष्ट्रिय सम्मेलन केन्द्र नयाँ वानेश्वरमा बोलाउन राष्ट्रपतिसमक्ष सिफारिस गर्ने निर्णय गरेको सञ्चारमन्त्री गोकुल बाँस्कोटाले जानकारी दिनुभयो । सरकारका प्रवक्ता बाँस्कोटाका अनुसार बैठकले नेपाल टेलिभिजनको अध्यक्ष नेपाल पत्रकार महासंघका पूर्वसभापति डा महेन्द्र विस्ट र राष्ट्रिय समाचार समितिको अध्यक्षमा हरिहर अधिकारीलाई नियुक्त गरेको छ।

यस्ता छन् मन्त्रीपरिषद्का ९ निर्णय जस्ताको तस्तै ;

– संघीय संसदको संयुक्त बैठक र संयुक्त समिति कार्यसञ्चालन नियमावली २०७५ पारित गर्ने प्रयोजनका लागि संघीय संसदको दुबै सदनको संयुक्त बैठक असार २० गते अपराह्न ४ बजे अन्तर्राष्ट्रिय सम्मेलन केन्द्र नयाँ वानेश्वरमा बोलाउन राष्ट्रपतिसमक्ष सिफारिस गर्ने।

– नेपालको तर्फबाट एसियाली विकास बैंकको वैकल्पिक निर्देशक पदमा मनिलामा कार्यरत डा। सोमनाथ सुवेदीलाई सो पदबाट फिर्ता गरी सो स्थानमा अर्थमन्त्रालयका सहसचिव रामशरण पुडासैनीलाई मनोनयन गर्ने ।

– नेपाल सरकार र चीनको चीन अन्तर्राष्ट्रिय सहायता विकास नियोगबीच मानव विकास सहायता सम्बन्धी समझदारी गर्ने, त्यसैगरी नेपाल सरकार र चीनको द नेशनल डेभलपमेन्ट एण्ड रिफर्म कमिसनबीच उत्पादन क्षमता विकासका लागि लगानी र सहयोगसम्बन्धी समझदारी गर्ने निर्णय।

– जापान सरकारबाट प्रोजेक्ट फोर ह्युमन रिसोर्स डेभलपमेन्ट स्कलरसीप अन्तर्गत प्राप्त हुने जापानी येन करिब २८ करोड २० लाख ९नेपाली २७ करोड ५५ लाख० अनुदान सहायता स्वीकार गर्ने निर्णय।

– नेपाल सरकार उर्जा जलस्रोत तथा सिँचाई मन्त्रालय र चाइना कम्युनिकेशन कन्स्ट्रक्सन कम्पनीबीच सम्पन्न हुने मेमोरेन्डम अफ अण्डर स्ट्याण्डिङ एण्ड कोपरेशनलाई स्वीकृत गर्ने साथै उक्त समझदारीपत्रमा हस्ताक्षर गर्न सम्बन्धित मन्त्रालयका पदाधिकारीलाई अख्तियारी प्रदान गर्ने निर्णय।

– नेपालको संघीय, प्रदेश तथा स्थानीय तहमा रहेका सार्वजनिक वित्त तथा खरिद व्यवस्थापनमा संलग्न संस्थाहरुको प्रणाली तथा कार्यविधिलाई सरलीकरण तथा प्रभावकारी बनाउने उद्देश्य राखी विश्व बैंक समूहको अन्तर्राष्ट्रिय विकास संस्था आइडिएबाट करिब १५ मिलियन बराबरको सहायता स्वीकार गर्ने र त्यसका लागि सरकारका तर्फबाट वार्ता टोली गठन गर्ने निर्णय।

– नेपाल टेलिभिजन र राष्ट्रिय समाचार समितिको अध्यक्षमा क्रमशः महेन्द्र विस्ट र हरिहर अधिकारीलाई नियुक्त गर्ने निर्णय भएको छ।

– पावर ग्रीड इन्टरकनेक्शन सम्भाव्यता अध्ययन गर्न नेपाल विद्युत प्राधिकरण तथा स्टेट ग्रीड कोपरेशन कर्पोरेशन चाइनाबीच सहायता सम्झौतामा हस्ताक्षर गर्न र अख्तियारी दिने निर्णय।

– सदर चिडियाखाना जावलाखेलमा रहेको एउटा भाले जो साइटी सन्धिअनुसार भारतको रहेछ, त्यो भारत सरकारलाई फिर्ता गर्ने निर्णय ।

June 14, 2018मा प्रकाशित

Leave a Reply

Your email address will not be published. Required fields are marked *