काठमाडौं, असोज २२ । भारतीय चलचित्रका दिग्गज अभिनेता नाना पाटेकरको ७५ वर्षको उमेरमा निधन भएको छ ।

भारतीय सञ्चारमाध्यमका अनुसार उहाँको बिहीबार बिहान गोवास्थित आफ्नै निवासमा हृदयघातका कारण निधन भएको हो । उहाँलाई निवासमा अचेत अवस्थामा भेटिएपछि तत्काल अस्पताल लगिएको थियो । चिकित्सकहरूले करिब ४५ मिनेटसम्म सीपीआर दिएर बचाउने प्रयास गरे पनि सफल हुन सकेन ।

प्रारम्भिक विवरणअनुसार बिहान करिब ५ः२० बजे उहाँलाई गम्भीर कार्डियक अरेस्ट भएको थियो । मृत्युको औपचारिक कारण पोस्टमार्टमपछि थप स्पष्ट हुने बताइएको छ ।

सन् १९५१ जनवरी १ मा महाराष्ट्रमा जन्मिनुभएका विश्वनाथ पाटेकर अर्थात् नाना पाटेकरले सन् १९७८ मा ‘गमन’बाट चलचित्र क्षेत्रमा अभिनय यात्रा सुरु गर्नुभएको थियो । हिन्दी र मराठी दुवै भाषाका चलचित्रमा काम गर्नुभएका उहाँ अभिनयसँगै निर्देशन र लेखनमा समेत सक्रिय हुनुहुन्थ्यो ।

‘परिन्दा’, ‘क्रान्तिवीर’, ‘अग्निसाक्षी’, ‘खामोशी : द म्युजिकल’, ‘अब तक छप्पन’, ‘अपहरण’, ‘राजनीति’, ‘वेलकम’लगायत चलचित्रमा उहाँले प्रभावशाली भूमिका निर्वाह गर्नुभएको थियो ।

गम्भीर, प्रहरी, राजनीतिक तथा हास्य भूमिकालाई आफ्नै शैलीमा प्रस्तुत गर्ने उहाँ भारतीय चलचित्रका विशिष्ट अभिनेताका रूपमा परिचित हुनुहुन्थ्यो । उहाँले राष्ट्रिय चलचित्र पुरस्कारसहित विभिन्न सम्मान प्राप्त गर्नुभएको थियो ।

उहाँको निधनसँगै हिन्दी तथा मराठी चलचित्र क्षेत्रले प्रभावशाली अभिनेता गुमाएको छ ।