काठमाडौं, असोज २४ । अमेरिकी राष्ट्रपति डोनाल्ड ट्रम्पले सन् २०२६ को नोबेल शान्ति पुरस्कार आफूले नपाएकोमा असन्तुष्टि जनाउँदै कम्तीमा आठवटा पुरस्कार पाउनुपर्ने दाबी गरेका छन्।

नोबेल शान्ति पुरस्कार भारतीय मूलकी दक्षिण अफ्रिकी न्यायविद् नाभी पिल्लेलाई प्रदान गरिएको प्रसंगमा टिप्पणी गर्दै ट्रम्पले आफूले विभिन्न द्वन्द्व समाधान गरेको र धेरै मानिसको ज्यान बचाएको जिकिर गरेका हुन्।

सामाजिक सञ्जालमा उनले पिल्लेबारे आफू र सर्वसाधारणलाई पर्याप्त जानकारी नभएको टिप्पणी गर्दै उनीमाथि इजरायलविरोधी रहेको आरोपसमेत लगाएका छन्।

ट्रम्पले कम्बोडिया–थाइल्यान्ड, कोसोभो–सर्बिया, प्रजातान्त्रिक गणतन्त्र कंगो–रुवान्डा, भारत–पाकिस्तान, इजरायल–इरान, इजिप्ट–इथियोपिया, आर्मेनिया–अजरबैजान तथा इजरायल–हमासबीचका द्वन्द्व समाधान गरेको दाबी गरेका छन्।

भारत र पाकिस्तानबीचको तनाव रोक्न भूमिका खेलेकै आधारमा आफू नोबेल शान्ति पुरस्कारको हकदार भएको उनको तर्क छ। उनले इरानलाई आणविक हतियार बनाउनबाट रोकेको र मध्यपूर्वलाई विनाशबाट जोगाएको दाबीसमेत गरेका छन्।

ट्रम्पले सन् २०२५ की नोबेल शान्ति पुरस्कार विजेता मारिया कोरिना मचाडोले आफ्नो पदक आफूलाई दिएको प्रसंग पनि दोहोर्‍याएका छन्। हमासको नियन्त्रणमा रहेका बन्धक फिर्ता ल्याउन भूमिका खेलेको र भेनेजुएलाका नेता निकोलस मादुरोलाई सत्ताबाट हटाउन सहयोग गरेको दाबी पनि उनले गरेका छन्।

उनले नोबेल शान्ति पुरस्कार छनोट प्रक्रियाको आलोचना गर्दै संयुक्त राष्ट्रसंघको सहयोगबिनै विश्वका ठूला समस्या समाधान गरेको बताएका छन्।

ट्रम्पले विभिन्न द्वन्द्व समाधान गरेको र युद्ध रोकेको भनी गरेका दाबी तथा ती घटनामा उनको वास्तविक भूमिकाबारे भने स्वतन्त्र पुष्टि आवश्यक छ।