काठमाडौं, २५ जेठ ।२० महिनाअघि हमास समूहले इजरायलमा आक्रमण गरी अपहरण गरिएका थाई नागरिकको शव भेटिएको छ। उनीसँगै अपहरणमा परेका नेपालका विपिन जोशीको अवस्था भने अज्ञात छ ।थाई नागरिक नातापोङ पिन्ताको शव दक्षिणी गाजाको राफह क्षेत्रबाट भेटिएको इजरायलका रक्षामन्त्री इजरायल कट्जलाई उद्धृत गर्दै बीबीसीले जनाएको छ । इजरायली सेनाले गाजामा बिशेष गरी उनको शव निकालेको हो । ती थाई नागरिक कृषि मजदुरका रुपमा दक्षिणी इजरायलमा कार्यरत थिए। सात जना थाई नगरिक त्यसबेला अपहरणमा परेकोमा पाँच जनालाई हमासले ६ महिनाअघि रिहा गरेको थियो।

अपहरण गरिएको एक महिनाभित्रै ती थाई नागरिकको हत्या गरिएको हुनसक्ने इजरायली सैनिक अधिकारीले जनाएका छन् ।यही सातामा इजरायली सेनाले इजरायली अमेरिकनको शव गाजामा भेटाएको थियो । ७ अक्टोबर २०२३ मा हमास नेतृत्वको समूहले इजरायलमा आक्रमण गरी इजरायली सेनासहित विभिन्न देशका नागरिकलाई अपहरण गरेको थियो । त्यसरी अपहरण गरि बन्धक बनाइएकामध्ये केहीलाई रिहा गरिएकोमा कतिपयको शव भेटिएको थियो । नेपालका विपिन जोशी लगायत केहीको अवस्था अझै अज्ञात छ । २० महिनाअघि हमासले गरेको आक्रमणपछि इजरायल–प्यालेस्टाइन युद्ध चलिरेहको छ । जसमा ५४ हजार भन्दा धेरैले ज्यान गुमाइसकेका छन् ।