काठमाडौ, जेठ ५

दक्षिणी चीनको सेन्जेन सहरस्थित एक गगनचुम्बी भवन अचानक हल्लिन थालेसँगै उक्त भवनमा मानिसहरुको उद्धार गरिएको छ । ७३ तले भवन मंगलबार अचानक हल्लिएपछि उक्त भवनमा रहेका सबैको उद्धार गरिएको थियो । चीनमा हाल भुकम्प नगएको भन्दै ९८० फिट अग्लो एसईजी प्लाजा किन हल्लियो भन्नेबारे अनुसन्धान भइरहेको छ । २० वर्ष पुरानो यो भवनमा धेरै कम्पनीका कार्यालयहरु छन् भने यसमा इलेक्ट्रोनिक्सको एक ठूलो बजार लाग्ने गरेको छ ।

एक ठूलो सपिङ सेन्टरको रुपमा चिनिँदै आएको यो भवन चीनको सेन्जेन भवनको बीचस्थित छ । करिब एक करोड २५ लाख जनसंख्या रहेको यो शहरमा यो भवन छ । चिनियाँहरुले भूकम्प नआउँदा नै भवन किन हल्लिएको हो भनेर आशंका व्यक्त गरिरहेका छन् । मौसमको रिपोर्टअनुसार त्यतिबेला हावा २७ किलोमिटर प्रतिघन्टाको गतिमा थियो। जसले यति ठूलो भवनलाई हल्लाउने क्षमता राख्दैन।

चिनियाँ सरकारी समाचारपत्र द ग्लोबल टाइम्सका अनुसार मंगलबार दिउँसो साढे १२ बजेबाट उक्त भवन हल्लिन थालेको थियो । साढे २ बजेसम्म यो भवन खाली गराइएको थियो । एईजी प्लाजा चीनको १०४ औं अग्लो भवन हो भने विश्वभरका भवनमध्ये २१२ औं स्थानमा छ।

‘बिल्डिङ आसपासका जमिनमा कुनै दरार देखिएको छैन। बिल्डिङको बाहिरपट्टि कुनै क्षति भएको छैन । त्यसैले यसरी बिल्डिङ हल्लिनु चिन्ताजनक छ। हामी यसबारेमा विस्तृत अनुसन्धान गरिरहेका छौं,’स्थानीय प्रशासनले जारी गरेको विज्ञप्तिमा भनिएको छ। घटनामा कुनै मानविय क्षति तथा कसैलाई चोट पटक भने लागेको छैन। एजेन्सी