आफ्ना लागि सुबिधाको गाडी किन्ने पैसाले खानेपानी ट्यांकी किनेर जनतालाई सेवा दिएपछि सवैका लागि प्रेरणाको स्रोत बन्नुभएका सर्लाहीको बागमती नगरपालिकाका मेयर भरत कुमार थापा यतिबेला निकै चर्चामा हुनुहुन्छ । मेयर थापाको जनताप्रतिको समर्पण भाव र इमान्दारिताले नगरको भविष्य उज्वल देखिएको छ । जनताको सेवालाई पहिलो प्राथमिकतामा राखेर काम गरेकै कारण उहाँप्रति बागमतिका मतदाता निकै आशावादी छन । नगरको मुहार फर्ने अभियानको नेतृत्व गर्नुभएका थापा जनतालाई देखाएको सपना पूरा नभएसम्म जनप्रतिनिधिका हैसियतमा पाउने कुनै सेवा सुबिधा लिनुभएको छैन ।
मेयरले पाउने सेवा सुविधा नलिएर जनतालाई वितरण गर्नु भएको छ, यस्तो सोच कहाँबाट आयो ?
हामी राजनीतिकर्मी आफ्ने स्वार्थ छोडेर जनताको सेवा गर्न होमिएका हौं । हामी सुविधामूखी होइन सेवामूुखी हुनुपर्छ । मेरो नगरमा गरिबका छोराछोरी पढ्न पाएका छैनन्, बिरामी हुँदा औषधि खान पाएका छैनन्, तिनै बालबालिकाको बिचल्ली हेरेर मैले सेवा सुविधा लिनुहुँदैन लाग्यो र लिएन । मैले जति पनि सेवा सुविधा पाउछु त्यो विपन्न गरिब जनताका छोराछोरीको स्वास्थ्य, शिक्षामा खर्च गर्ने छु । मेयरले चढ्ने गाडी खरिद गर्न छुट्याएको रकमले चुरेक्षेत्रका बासीलाई पानी ट्याङ्की किनेका छौं । यसबाट उहाँहरू खुसी हुनुहुन्छ ।
मेरो मेयर गाडी चढोस्, तलब भत्ता लेओस्, उसले तलब भत्ता नलिदा अन्यत्र सोच्न नपरोस् भन्ने पनि त जनताको अपेक्षा होला। के गरेपछि लिनुहुन्छ तलब भत्ता ?
जनताको समृद्धि, सुशासन, गास, बास, कपास र रोजगार बनाउने अभियानमा हिडेका हामीले जनतालाई जे सपना देखायौं, त्यो पुरा नभइकन कसरी आफु ती सेवा सुविधा लिनु ?
त्यसोभए तँपाइका प्रथमिकता के–के हुन ?
पूर्वाधार, शिक्षा, स्वास्थ्य र चेतना बृद्धि मेरो प्राथमिकतामा छन् ।
छोरा जन्माउनेलाइ तीन हजार र छोरी जन्माउनेलाई पाँच हजार सुत्केरी भत्ताको व्यवस्था गरिएको छ । यस्तो किन गरिएको हो ?
छोराछोरीबीचको विभेद केही हदसम्म कम गर्न सकिन्छ कि भनेर यस्तो गरिएको हो । यसबाट पनि राम्रो प्रतिक्रिया पाइरहेको छु ।
हिजो दलविहीन संस्कार, संस्कृतीबाट चल्दै आएको प्रशासनतन्त्रसँग काम गर्न कत्तिको गाह्रो छ ?
सुरु सुरुमा गाह्रो भयो । किनकी हिजोको संस्कारमा काम गरिरहेका प्रशासकहरुले आफ्नै तरिकाले काम गर्नुहुन्थ्यो । जनप्रतिनिधि निर्वाचित भएर आइसके पछि जनताको सपनासँग जोडिएका जनमुखी कार्य गर्नुपर्ने भयो । पहिले त्यस्तो थिएन । हाम्रा काम कस्ता छन ? जनताकै सामु गएर सार्वजनिक सुनुवाई गरेका छौं । गलत भए सुझाव दिनुहुन्छ त्यसलाई हामि सच्याउछौं । जनताको विकासका लागि आएको बजेट जनताकै विकासको लागि खर्च गरेका छौं । धेरै गाह्रो छैन् ।
कानुनी जटिलताहरु के के छन् ?
कानुनी जटिलताहरु छैनन् । हामिलाई दिएको एकल अधिकार अन्तर्गत हामिले कानुन निर्माण गरिसकेका छौं । कानुन निर्माण हुनुअघि कार्यविधि निर्माण गरि काम गर्यौं । अहिले आवश्यक सबै ऐन बनिसकेका छन् । हामिलाई काम गर्नको लागि कानुनी बाधा छैन । तर साझा अधिकारका ऐन बनाउन बाँकी छ ।
शिक्षा सम्बन्धि उत्कृष्ट काम गरेका देशभरिका नगरहरु मध्ये तपाईको नगर पनि पर्छ । कस्तो लागि रहेको छ ?
खुसी लागेको छ, यो मानेमा खुसी लाग्यो कि हिजोका शिक्षा नीति, शिक्षक नीति, पठनपाठन तरिकालाई हामीले सुधार गर्न सफल भएका छौं । हामी निर्वाचित भएर आएपछि सबै शिक्षक, विद्यालय व्यवस्थापन समिति, अभिभावक बसेर छलफल गर्यौं र सबै समुदायिक विद्यालयमा अंग्रेजी माध्यमबाट पढाउन सुरु गरेपछि अहिले अभिभावक, विद्यार्थी खुसी छन् । विद्यालयमा विद्यार्थी पनि बढेका छन् । हामिले गरेको कामलाई शिक्षा मन्त्रालाय, शिक्षा विभागले सहि मूल्यांकन गरि नेपालकै उत्कृष्ट विद्यालयको सूचिमा राखि पुरस्कार समेत प्रदान गरेको छ ।
धेरै नगरपालिका अनुदानमा निर्भर रहने अवस्था छ । तपाईँको नगरपालिकाको आन्तरिक स्रोत बृद्धिमा के कस्ता प्रयास भइरहेका छन् ?
आर्थिक स्रोतका कारण नगरपालिका गाँउपालिकामा पनि झर्न सक्छन् । त्यसकारण हामिले आर्थिक पक्षलाई बलियो बनाउन प्रती जमिनमा ८८ विघाको माछा पोखरी निर्माण गर्न लागेका छौं, त्यसको लागि टेन्डर लगि सकेको छ । अर्थमन्त्रालयमा त्यसको डि।पि।आर समेत पेश गरेर विशेष अनुदानबाट केहि रकम प्राप्त गरेका छौं । त्यसबाट अन्तरिक पर्यटनमा बृद्धि हुने, माछा पालन गरेर वार्षिक पाँच करोड भन्दा बढि आम्दानी हुने अनुमान गरेका छौं ।
हाम्रो नगरपालिकामा नुनथर, तपोवनजस्ता धार्मिक स्थलहरु छन् । सबै चडपर्वमा धार्मिक मेला लाग्ने भएकाले त्यहाँ ‘फनपार्क’ ‘पिक्निक स्पोर्ट’ बनाउदैछौं । फनपार्क भित्र पाँच तारे होटेल, बोटिङ, बच्चाहरुको लागि चिल्ड्रेन पार्क, स्वीमिङ पुल देखि नगरको संस्कृति झल्कने गरि पाँच विघा क्षेत्रमा फन पार्क निर्माण गर्दैछौं । आज भोली नै नगर विकास कोषबाट त्यसको स्वीकृति हुन्छ । आम्दानि वार्षिक तीन कारोड भन्दा माथि नै अनुमान गरेका छौं ।
त्यसका साथै रोड साइडमा कृषि आधुनिकीकरण गरि कृषि उत्पादन, व्यवस्थापन, बजारीकरण, गर्न सहकारी मार्फत अगाडी बढ्ने उद्देश्यले सहकारीसंस्था पनि निर्माण गरिसकेका छौं । अहिलेसम्म दुई हजार भन्दा बढी सदस्य भइसक्नुभएको छ । एक व्यक्ति एक शेयर भन्ने अभियानसहित अगाडी बढेका छौं । हामीले संघ, प्रदेशको मुख ताक्नुपर्ने अवस्था नआउला ।
नगरमा सुशासनको लागि के कस्तो प्रयास भइरहेको छ ?
स्थानीय दररेट कायम गरेर जति रकम पर्ने हो त्यति नै रेट कायम गरेपछि कसले कहाँ खाने र कति बँच्छ र कस्लाई दिने रु जहाँ भ्रष्टचार हुने सम्भावना छ त्यसलाइ त्यहि अन्त्य गरिदिए पछि भ्रष्टचार हुँदैन । भ्रष्टचार हुनै नसक्ने प्रणाली निर्माण गरेकाछौं ।
तपाईको कार्यकालको अन्त्यमा नगरमा के के भएको पाउने छौं ?
देशकै नमुना, जीवनस्तर उकासिएको, आय स्रोत बढेको, सुशासन, सम्बृद्धिसहितको स्वर्ग जस्तो नगरपालिका भएको पाउनु हुनेछ । हरेक वर्ष परिवर्तन भएको पाउनु हुनेछ । वर्सैपिच्छे आएर हेर्नु होला। सबैको खुशी भरिएको अनुहार हेर्ने मेरो सपना छ । (मेयर खवरका लागि शिव अधिकारीले गर्नुभएको कुराकानीमा आधारित )
प्रतिक्रिया दिनुहोस्