जनता टाइम्स

१७ चैत्र २०८१, आईतवार १७:३१

पत्रकार रजकका परिवारलाई क्षतिपूर्तिसहित दोषीलाई कडा कारबाहीको माग गर्दै प्रेस चौतारीले सरकारलाई बुझायो ज्ञापन–पत्र (पूर्णपाठ)


काठमाडौं, चैत १७ । प्रेस चौतारी नेपालले चैत्र १५ गते काठमाडौंमा राजावादीको आन्दोलनमा जलाएर हत्या गरिएका पत्रकार सुरेश रजकका परिवारलाई क्षतिपूर्तिसहित दोषीलाई कडा कानुनी कारबाही गर्न र आन्दोलनकारीले तोडफोड गरी क्षति पुर्याएका सञ्चार गृहलाई क्षतिपूर्तिको माग गर्दै सरकरलाई ज्ञापन–पत्र बुझाएको छ ।

प्रेस चौतारीका अध्यक्ष गणेश पाण्डेको नेतृत्वमा गएको प्रतिनिधिमण्डलले आज सरकारका प्रवक्तासमेत रहनुभएका सञ्चार तथा सूचना प्रविधिमन्त्री पृथ्वीसुब्बा गुरुङलाई ५ बुँदे ज्ञापन–पत्र बुझाएको हो । ज्ञापन–पत्र बुझ्दै सञ्चारमन्त्री गुरुङले घटनाको सत्यतथ्य बुझी दोषीलाई कारबाही गर्ने प्रतिवद्दता व्यक्त गर्नुभएको छ ।

‘ कथित राजावादी समूहको नाममा मिति २०८१ चैत १५ गते काठमाडौंमा भएको अराजकतापूर्ण र हिंसात्मक प्रदर्शनका क्रममा समाचार संकलनमा रहेका पत्रकारको ज्यान गुमेको र पत्रकार तथा सञ्चारमाध्यममाथि सुनियोजित रुपमा आक्रमण भएको घटनाले नेपाली श्रमजीवी पत्रकारहरुको सवैभन्दा ठूलो संगठन प्रेस चौतारी नेपाल स्तब्ध बनेको छ ।

प्रदर्शनका क्रममा भएका आतंकपूर्ण र हिंसात्मक घटनाले सिंगो सञ्चार क्षेत्र त्रसित र मर्माहत भएकाले माननीय सञ्चारमन्त्रीज्यूमार्फत नेपाल सरकारसमक्ष प्रेस चौतारी नेपालका तर्फबाट निम्नानुसार ध्यानाकर्षणसहित कडा कदम चाल्न यो ज्ञापन–पत्र पेश गरेका छौं,’ ज्ञापन–पत्रमा भनिएको छ ।

ज्ञापन–पत्रको पूर्णपाठ
माननीय पृथ्वीसुब्बा गुरुङज्यू,
मन्त्री, सञ्चार तथा सूचना प्रविधि मन्त्रालय
सिंहदरबार, काठमाडौं ।

विषयः ज्ञापन–पत्र सम्बन्धमा ।

महोदय,

कथित राजावादी समूहको नाममा मिति २०८१ चैत १५ गते काठमाडौंमा भएको अराजकतापूर्ण र हिंसात्मक प्रदर्शनका क्रममा समाचार संकलनमा रहेका पत्रकारको ज्यान गुमेको र पत्रकार तथा सञ्चारमाध्यममाथि सुनियोजित रुपमा आक्रमण भएको घटनाले नेपाली श्रमजीवी पत्रकारहरुको सवैभन्दा ठूलो संगठन प्रेस चौतारी नेपाल स्तब्ध बनेको छ । प्रदर्शनका क्रममा भएका आतंकपूर्ण र हिंसात्मक घटनाले सिंगो सञ्चार क्षेत्र त्रसित र मर्माहत भएकाले माननीय सञ्चारमन्त्रीज्यूमार्फत नेपाल सरकारसमक्ष प्रेस चौतारी नेपालका तर्फबाट निम्नानुसार ध्यानाकर्षणसहित कडा कदम चाल्न यो ज्ञापन–पत्र पेश गरेका छौं ।

१. काठमाडौंको तीनकुनेमा प्रदर्शनकारीले हिंसात्मक ढंगले निजी भवनमा आगजनी गर्दा सोही भवनको माथिल्लो तलामा बसेर समाचार छायांकन गरिरहेका एभिन्यूज टेलिभिजनका पत्रकार सुरेश रजकको कार्यस्थलमै जलेर मृत्यु भएको छ । आन्दोलनकारीले लुटपाट गरेको भिडियो सार्वजनिक हुने डरले रजकलाई आगो लागेको भवनमै थुनेर बाहिर निस्केको विवरणहरु आइरहेका छन । घटनापछि प्राप्त दृष्यहरुले उहाँको सुनियोजित रुपमै हत्या गरेको गम्भीर आशंका उब्जाएको छ । कार्यस्थलमै एक जना पत्रकारले जिउदै जलाएर ज्यान लिने र पत्रकारले मृत्युवरण गर्नुपर्ने कहालीलाग्दो र आततीय घटनाको छानबिन गरी दोषीमाथि कडा भन्दा कडा कारबाही गर्न हामी सरकारसँग माग गर्दछौं । साथै मृतक रजक र उहाँका परिवारलाई राहत तथा परिपुरणको व्यवस्था गर्न आग्रह गर्दछौं ।

२. राज्यबाट अनुमति लिएर सञ्चालन भइरहेको एभिन्यूज टेलिभिजनका मालिक भाष्करराज राजकर्णिकारले चैत १५ गतेको हिंसात्मक आन्दोलनमा ऐक्यबद्धता जनाउँदै प्रतिगमनलाई मलजल गर्ने गरी समाचार सामाग्री प्रकाशन÷प्रशारण तथा संघीय लोकतान्त्रिक गणतन्त्रको विरुद्धमा मिडिया परिचालन गरिरहेको अवस्था छ । मृतक रजकको हत्याको घटनामा उक्त टेलिभिजनका मालिक राजकर्णिकारलाई पनि जवाफदेही बनाउन तथा मृतक रजकले महिनौंदेखि तलब पाउन बाँकी रहेकोले मृतकका परिवारलाई यथाशीघ्र बाँकी तलब तथा श्रमजीवी पत्रकार ऐनअनुसार पाउनुपर्ने सम्पूर्ण सेवा÷सुविधा उपलब्ध गराउन टेलिभिजन व्यवस्थापनलाई कानुन अनुसार बाध्यकारी बनाउन सरकारको गम्भीर ध्यानाकर्षण गराउन चाहन्छौं ।

३. प्रेस चौतारी नेपालको टोलीले चैत १६ गते अन्नपूर्ण पोष्ट दैनिकको कार्यालय, कान्तिपुर टेलिभिजन, हिमालय टेलिभिजन र अनलाइन खबर डटकममा स्थलगत अनुगमन तथा घटना विवरणबारे जानकारी लिएको छ । अनुगमनका क्रममा अन्नपूर्ण पोष्ट दैनिकको कार्यालय तथा कान्तिपुर टेलिभिजनको भवनमा क्षति पुगेको पाइएको छ भने हिमालय टेलिभिजनको गाडी तोडफोड हुनुका साथै समाचार संकलनमा रहेका पत्रकारहरु घाइते भएको अवस्था छ । यसैगरी, अनलाइन खबर डटकमका फोटो पत्रकार दिनेश गौतम प्रदर्शनकारीको आक्रमणबाट खुट्टा भाँचिएको छ । हामी तोडफोड र आक्रमणबाट क्षति भएका सञ्चारमाध्यमहरुलाई क्षतिपूर्ति दिलाउन तथा घाइते पत्रकारको उपचारको उचित व्यवस्था गर्न माग गर्दछौं ।

४. शान्तिपूर्ण प्रदर्शन गर्न पाउनु नागरिक अधिकार भएपनि आन्दोलनको बहानामा भएका यस्ता अराजक एवं आपत्तिजनक गतिविधिको शिकार पत्रकार र सञ्चारमाध्यम हुनु गम्भीर चिन्ताको विषय हो । काठमाडौंमा चैत १५ सम्पन्न प्रेस चौतारी नेपालको केन्द्रीय समितिको प्रथम बैठकले यस्ता अराजकतापूर्ण घटनाको कडा शब्दमा निन्दा र भत्र्सना गरेको छ । सो घटनामा संलग्न दोषीहरुमाथि कडा कारबाही गर्न पनि बैठकले सरकारसँग माग गरेको माननीय मन्त्रीज्यूलाई जानकारी गराउन चाहन्छौं । जनताको बलिदानी, कष्टसाध्य संघर्ष र त्यागबाट प्राप्त नेपालको लोकतान्त्रिक गणतन्त्रमाथि धाबा बोल्दै भइरहेका यस्ता अराजक गतिविधिलाई तत्काल निष्तेज गर्न प्रेस चौतारी नेपाल सरकारसमक्ष जोडदार माग गर्दछ । साथै यो काममा सरकारलाई सिंगो नेपाली सञ्चार क्षेत्रको साथ रहेको अवगत गराउन चाहन्छ ।

५. संविधान प्रदत्त पूर्ण प्रेस स्वतन्त्रताको अधिकारको सम्मान गर्दै पत्रकारहरुको सुरक्षाको प्रत्याभूति दिलाउन तथा निर्वाध रुपमा समाचार संकलन, सम्प्रेषण र प्रकाशन÷प्रशारणमा अवरोध सिर्जना नहुने गरी पूर्ण प्रेस स्वतन्त्रताको प्रत्याभूति दिलाउन पनि हामी सरकारको ध्यानाकर्षण गराउन चाहन्छौं ।

गणेश पाण्डे, अध्यक्ष

मितिः २०८१ चैत १७