काठमाडौं । नेपाली युवा पुस्तामा बुद्धिचालको विकास तथा प्रवर्द्धन गर्ने उद्देश्यले ‘पहिलो राष्ट्रिय जुनियर (२० वर्ष मुनिका) बुद्धिचाल प्रतियोगिता – २०८२’ आगामी असार २९ गतेदेखि काठमाडौंमा सुरु हुने भएको छ। प्रतियोगिता बौद्धीनिकुञ्ज नगरपालिकाको नगर कार्यपालिकाको समन्वयमा नगर युवा परिषद्ले आयोजना गर्न लागेको हो। नेपाल बुद्धिचाल महासंघको प्राविधिक सहयोगमा सञ्चालन हुने उक्त प्रतियोगिता काठमाडौंको बुढानिलकण्ठस्थित  त्रिज्योति सेकेण्डरी   विद्यालयमा असार २९ देखि ३१ गतेसम्म सञ्चालन हुनेछ।

एफआईडीई (FIDE) द्वारा मान्यता प्राप्त राष्ट्रियस्तरको यो प्रतियोगिता (इभेन्ट कोड: 426022 / 426023) मा २० वर्षमुनिका करिब २०० जना केटा तथा केटी खेलाडीहरूको सहभागिता रहने अपेक्षा गरिएको छ। प्रतियोगिता स्विस प्रणालीमा ९ चरणमा खेलिनेछ। यो प्रतियोगिता नेपाली नयाँ पुस्तामा बुद्धिचालको प्रचारप्रसार गर्नुका साथै नेपाल बुद्धिचाल महासंघको लक्ष्यअनुसार देशभर बुद्धिचालको विकासमा सहयोग पुगाउने विश्वास गरिएको छ। साथै, नयाँ प्रतिभाको पहिचान र तिनीहरूको मार्गदर्शन, खेल संस्कृतिको प्रवर्द्धन तथा युवाहरूको बौद्धिक क्षमता र सामाजिक विकासमा टेवा पुर्‍याउने उद्देश्य पनि प्रतियोगिताले राखेको छ।

प्रतियोगितामा सहभागी हुन माघ २०६१ पछि जन्मिएका सम्पूर्ण नेपाली खेलाडीहरू योग्य हुनेछन्। नेपाल बुद्धिचाल महासंघमा दर्ता भएका खेलाडीहरूका लागि प्रवेश शुल्क निःशुल्क रहनेछ। प्रतियोगिता अन्तर्गत U-8, U-10, U-12, U-14, U-16, र U-18 उमेर समूहमा केटा र केटी छुट्टाछुट्टै प्रतिस्पर्धा गरिनेछ भने प्रदेशस्तरको प्रवेश शुल्क १५०० रुपैयाँ तोकिएको छ। पुरस्कार राशिमा बुद्धिनिकुञ्ज नगरपालिकाको नियमानुसार २५% कर लागु हुनेछ।

प्रतियोगिता असार २९ गते बिहान १०:३० बजे उद्घाटन समारोहसहित सुरु हुनेछ भने सोही दिन तीन चरणका खेल सञ्चालन हुनेछन्। असार ३० मा थप चार चरण तथा असार ३१ गते दुई चरणसहित समापन समारोहको आयोजना गरिनेछ। आयोजक संस्थाले यस कार्यक्रमलाई नेपालको युवा बुद्धिचाल विकासको दिशामा एक महत्वपूर्ण मोडका रूपमा लिएको छ र यसबाट भविष्यमा देशको बौद्धिक खेल नेतृत्व तथा अनुशासनको सशक्त आधार तयार हुने अपेक्षा गरिएको छ।