काठमाडौं, कात्तिक २ । चीन भ्रमणमा रहनु भएका उपप्रधान तथा गृहमन्त्री नारायणकाजी श्रेष्ठ अस्पताल भर्ना हुनुभएको छ । स्वास्थ्यमा समस्या देखिएपछि उपप्रधानमन्त्री श्रेष्ठ बेइजिङस्थित एक अस्पतालमा भर्ना हुनुभएको हो ।

अस्पतालमा चेकजाँचका क्रममा श्रेष्ठलाई माइल्ड हर्टअट्याक भएको पत्ता लागेको स्वकीय सचिव सुरेशकाजी श्रेष्ठले जानकारी दिनुभयो ।बीआरआईको कार्यक्रमका लागि बेइजिङमा रहेका श्रेष्ठलाई बुधबार दिउँसोदेखि नै असहज भइरहेको थियो । बेलुका कोठामा फर्किएपछि धेरै नै छाती दुखेपछि अस्पताल लगिएको थियो ।

अस्पतालमा उहाँको एन्जियोग्राम गरेर हेर्दा मुटुको एकतर्फीको भल्भमा रक्तसञ्चारमा अवरोध देखिएपछि त्यसलाई खुलाइएको स्वकीय सचिव श्रेष्ठले बताउनुभयो । हाल उहाँलाई निगरानीका लागि आईसीयूमा राखिएको छ ।

गृहमन्त्री श्रेष्ठको सचिवालयका अनुसार उहाँ अहिले खतरामुक्त हुनुहुन्छ । बीआरआईको कार्यक्रममा सहभागी भएर शुक्रबार नेपाल फर्किने कार्यक्रम रहेको थियो ।