काठमाडौं, असार ३१। स्पेनले विश्वकप २०२६ को सेमिफाइनलमा फ्रान्सलाई २–० ले पराजित गर्दै फाइनलमा स्थान सुरक्षित गरेको छ।

अमेरिकाको टेक्सासस्थित आर्लिङ्टनमा सम्पन्न खेलमा उत्कृष्ट सामूहिक प्रदर्शन गरेको स्पेनले फ्रान्सको तेस्रो पटक विश्वकप उपाधि जित्ने सपना समाप्त पारिदिएको हो।

अब स्पेनले विश्वकप उपाधिका लागि इङ्ल्यान्ड र अर्जेन्टिनाबीच हुने अर्को सेमिफाइनलको विजेतासँग प्रतिस्पर्धा गर्नेछ।

खेलको पहिलो हाफमा मिकेल ओयार्जाबलले पेनाल्टीमार्फत स्पेनलाई अग्रता दिलाउनुभयो। दोस्रो हाफमा पेड्रो पोरोले अर्को गोल थप्दै स्पेनको जित सुनिश्चित गर्नुभयो।

खेलको मध्यतिर साल्भाडोरका रेफ्री इभान बार्टनले स्पेनलाई पेनाल्टीको अवसर दिनुभएको थियो। फ्रान्सका लेफ्ट–ब्याक लुकास डिन्येले स्पेनका युवा विङ्गर लामिन यामलमाथि लापरबाहीपूर्ण ट्याकल गरेपछि रेफ्रीले पेनाल्टीको निर्णय सुनाउनुभएको हो।

पेनाल्टी प्रहारमा ओयार्जाबलले कुनै गल्ती गर्नुभएन। उहाँले फ्रान्सका गोलकिपरको पहुँचभन्दा बाहिर बल प्रहार गर्दै प्रतियोगितामा व्यक्तिगत पाँचौँ गोल पूरा गर्नुभयो। उक्त गोलसँगै फ्रान्स यस विश्वकपमा पहिलो पटक खेलमा पछि परेको थियो।

गोल खाएको केही समयमै फ्रान्सले अर्को धक्का बेहोर्नुपर्‍यो। सेन्टर–ब्याक विलियम सलिबाको पुरानो ढाडको चोट बल्झिएपछि उहाँ मैदान छाड्न बाध्य हुनुभयो। उहाँको स्थानमा म्याक्सेन्स लाक्रोआ मैदान प्रवेश गर्नुभएको थियो।

स्पेनले आकर्षक छोटो पास र सामूहिक खेलमार्फत फ्रान्समाथि निरन्तर दबाब कायम राख्यो। फाबियन रुइज गोल नजिक पुगे पनि दायो उपामेकानोको उत्कृष्ट हस्तक्षेपका कारण फ्रान्स थप गोल खानबाट जोगिएको थियो।

पहिलो हाफभर फ्रान्सले स्पेनको पोस्टमा लक्ष्यित प्रहार गर्न सकेन। फ्रान्सले दुईवटा प्रहार गरे पनि कुनै पनि प्रहार लक्ष्यमा केन्द्रित हुन सकेनन्।

दोस्रो हाफमा फ्रान्सका प्रशिक्षक डिडिएर डेसच्याम्प्सले आक्रमणलाई थप प्रभावकारी बनाउने उद्देश्यले ब्राड्ली बार्कोलाको स्थानमा डिजिरे डुएलाई मैदानमा उतार्नुभयो। तर त्यसको एक मिनेटपछि नै स्पेनले दोस्रो गोल गर्दै फ्रान्सलाई थप दबाबमा पार्‍यो।

स्पेनको दोस्रो गोल उत्कृष्ट सामूहिक संयोजनको परिणाम बन्यो। डिफेन्डर पेड्रो पोरोले डानी ओल्मोसँग आकर्षक पास आदानप्रदान गर्दै पेनाल्टी क्षेत्रभित्र प्रवेश गर्नुभयो। त्यसपछि उहाँले संयमित प्रहारमार्फत बललाई जाली चुमाउँदै स्पेनको अग्रता दोब्बर बनाउनुभयो।

दुई गोलले पछि परेको फ्रान्सले खेलमा फर्किने प्रयास गरे पनि स्पेनको सुदृढ र अनुशासित रक्षापंक्तिसामु उसका स्टार खेलाडी प्रभावकारी बन्न सकेनन्।

अन्ततः फ्रान्समाथि २–० को प्रभावशाली जित निकाल्दै स्पेन विश्वकप २०२६ को फाइनलमा प्रवेश गर्न सफल भएको छ।