जाजरकोट, भदौ २३ । जाजरकोटको बारेकोटमा पहिरोमा परी दम्पती बेपत्ता भएका छन् । गए राती आएको पहिरोमा परेरबारेकोट गाउँपालिका ६ धुमाका मानबहादुर चलाउने र उहाँकी श्रीमती प्रेमकुमारी चलाउने बेपत्ता भएको प्रहरीले जनाएको छ ।

प्रहरीले उहाँहरुको छोरी सम्झनाको घाइते अवस्थामा उद्धार गरिएको जनाएको छ । राती १ बजे घटना भए पनि बिहान ६ बजे प्रहरी पुगेपछि ती बालिकाको उद्धार भएको डिएसपी पुरुषोत्तम पाण्डेले बताउनु भयो ।

सम्झनालाई थप उपचारका लागि नेपाली सेनाको हेलिकोप्टरबाट सुर्खेत पठाउने तयारी भइरहेको प्रमुख जिल्ला अधिकारी उमाकान्त अधिकारीले जानकारी दिनुभयो ।

बेपता दम्पतीको प्रहरी र स्थानीयले खोजी गरिरहेका छन। प्रेमकुमारी वडा सदस्य हुन् । रातभर पानी परेकोले उद्धारमा कठिनाइ भएको स्थानीयको भनाइ छ।