काठमाडौं, ११ साउन ।  विभिन्न स्थानमा भएका सवारी दुर्घटनामा चार जनाको मृत्यु भएको छ । दाङ, बारा, रुपन्देही लगायतका जिल्लामा भएका सवारी दुर्घटनामा ४ जनाको मृत्यु भएको हो ।
दाङको तुलसीपुर उपमहानगरपालिका–१५ मलवारस्थित सडकमा लु.प्र.०२–००१ प ३३९३ नम्बरको मोटरसाइकलको ठक्करबाट सोही ठाउँ बस्ने ७६ वर्षीया विष्णुकुमारी रेग्मीको शनिबार दिउँसो मृत्यु भएको छ । ठक्करबाट गम्भीर घाइते भएकी उनको नर्सिङहोम नेपालगंज बाँकेमा थप उपचारको क्रममा मृत्यु भएको हो । मोटरसाइकल चालकलाई प्रहरीले नियन्त्रणमा लिएको छ ।
त्यस्तै बाराको जीतपुर सिमरा उपमहानगरपालिका–४ स्थित सडकमा प्र.२–०३–०१५ प १७२६ नम्बरको मोटरसाइकलको ठक्करबाट सोही ठाउँ बस्ने ८० वर्षीय प्रेमप्रसाद भट्टको शनिबार राति मृत्यु भएको छ । ठक्करबाट गम्भीर घाइते भएका उनको बयोधा अस्पताल

वीरगन्जमा थप उपचारको क्रममा मृत्यु भएको हो । मोटरसाइकल चालकलाई प्रहरीले नियन्त्रणमा लिएको छ ।

उता, रुपन्देहीको बुटवल उपमहानगरपालिका–१२ नयाँगाउँस्थित सडकमा लु–६२ प ८७४६ नम्बरको मोटरसाइकलको ठक्करबाट पैदलयात्री सोही ठाउँ डेरा गरी बस्ने गुल्मी रेसुङ्गा नगरपालिका–४ इस्मा घर भएका देवकला अधिकारीको छोरा ३ वर्षीय बिष्णु अधिकारीको मृत्यु भएको छ । शनिबार राति भएको उक्त दुर्घटनामा गम्भीर घाइते भएका उनको लुम्बिनी प्रादेशिक अस्पताल बुटवलमा उपचारको क्रममा आइतबार बिहान मृत्यु भएको हो ।

साथै दुर्घटनामा घाइते भएका देवकला अधिकारीको सोही अस्पताल र अन्य १ जना पैदल यात्रीको एडमसिटी अस्पताल बुटवलमा उपचार भइरहेको छ । मोटरसाइकल चालकलाई प्रहरीले नियन्त्रणमा लिएको छ ।

त्यस्तै कैलालीको धनगढी उपमहानगरपालिका–१९ टाउनस्थित सडकमा साइकलबाट लडेर सोही ठाउँ बस्ने ५५ वर्षीय रामु आचार्यको शनिबार राति मृत्यु भएको छ ।

साइकलबाट लडेर गम्भीर घाइते भएका उनको सेती प्रादेशिक अस्पताल धनगढीमा उपचारको क्रममा मृत्यु भएको हो । सबै दुर्घटनाका सम्बन्धमा प्रहरीले आवश्यक अनुसन्धान भइरहेको जानकारी दिएको छ ।