काठमाडाैं, भदाै १६। जिल्ला प्रशासन कार्यालय धुलिखेल, काभ्रेपलाञ्चोकले बिपी राजमार्गमा रातिको समयमा सवारी सञ्चालनमा रोक लगाउने व्यवस्था भदौ मसान्तसम्म लम्ब्याउने निर्णय गरेको छ ।

गत वर्षको वर्षातले क्षतिग्रस्त बनेको बिपी राजमार्ग भौगोलिक रूपमा कमजोर रहेको र सामान्य वर्षातमै पहिरो खस्ने घटनाले बाटो अवरुद्ध हुने अवस्था  रहेकाेले यस्ताे निर्णय गरिएकाे प्रशासनले जनाएको छ । मनसुनको जोखिम अझै कायम रहेको भन्दै सुरक्षा समिति काभ्रेको आइतबार बसेको बैठकले यस्तो निर्णय गरेको हो ।

उक्त निर्णयअनुसार काभ्रेभञ्ज्याङ–भकुण्डेवेशी हुँदै सिन्धुलीतर्फ जाने सार्वजनिक तथा निजी सवारी साधनलाई साँझ ५ बजेदेखि बिहान ५ बजेसम्म सञ्चालन गर्न नपाइने भएकाे छ ।

सहायक प्रमुख जिल्ला अधिकारी सुदर्शन श्रेष्ठले यात्रु र सवारीसाधनलाई सम्भावित जोखिमबाट जोगाउन यो निर्णय गरिएको स्पष्ट पार्दै भदौ १६ गतेदेखि ३१ गतेसम्म यो व्यवस्था लागू हुने जानकारी दिनुभएको छ । उहाँले सवारी चालक र यात्रुलाई सचेत रहन आग्रह गर्नुभएको छ ।

यसअघि भदौ १५ गते रातिसम्म रातिको समयमा सवारी सञ्चालन गर्न रोक्ने व्यवस्था गरिएको थियो । अब सो अवधि भदौ मसान्तसम्म लम्बिएको छ ।