काठमाडौं, भदौ १७ । नेकपा एमाले र नेपाली कम्युनिस्ट पार्टी (नेकपा)का संसदीय दलका नेताहरूले प्रधानमन्त्री बालेन्द्र शाहको कार्यशैली सुधार गर्न संसद्बाट ध्यानाकर्षण गराउनुभएको छ।

बुधबार बसेको प्रतिनिधि सभा बैठकलाई सम्बोधन गर्दै नेपाली कम्युनिस्ट पार्टीका संसदीय दलका नेता पुष्पकमल दाहाल ‘प्रचण्ड’ र नेकपा एमालेका संसदीय दलका नेता रामबहादुर थापा ‘बादल’ले प्रधानमन्त्री शाहलाई कार्यशैली सुधार गर्न आग्रह गर्नुभएको हो।

प्रधानमन्त्रीले राजनीतिक दलहरूलाई बेवास्ता गरेको भन्दै प्रचण्डले आपत्ति जनाउनुभयो। प्रधानमन्त्री सबैको साझा व्यक्ति भएकाले सबै राजनीतिक दललाई विश्वासमा लिएर अघि बढ्नुपर्ने उहाँको भनाइ छ।

“प्रधानमन्त्री आउनुहुन्छ र कसैको अनुहार नहेरी जानुहुन्छ, यो कस्तो खालको कार्यशैली हो ? हामी सबैले सहयोग गर्छौँ भनिरहेका छौँ, तर प्रधानमन्त्रीले कसैको अनुहारसम्म हेर्नु नपर्ने सोच राख्नु उचित होइन । यो तरिकाले अगाडि बढ्न सकिँदैन,” प्रचण्डले भन्नुभयो।

उहाँले वर्तमान संकट समाधानका लागि प्रधानमन्त्रीले सबै पक्षलाई समेटेर जिम्मेवार ढंगले अघि बढ्नुपर्ने बताउनुभयो।

यस्तै, एमाले संसदीय दलका नेता बादलले प्रधानमन्त्री शाहको ‘एकाङ्की शासन शैली’ परिवर्तन हुनुपर्ने बताउनुभएको छ। सरकार संसद्प्रति पूर्ण रूपमा उत्तरदायी हुनुपर्ने र आफ्ना योजना तथा कामकारबाहीबारे प्रधानमन्त्रीले संसद्लाई निरन्तर जानकारी गराउनुपर्ने उहाँको भनाइ छ।

बादलले विद्यमान संकटको सामना राष्ट्रिय सहमतिबाट मात्र सम्भव हुने उल्लेख गर्दै राजनीतिक दल, नागरिक समाज र विज्ञहरू सम्मिलित बहुपक्षीय संयन्त्र निर्माण गर्न सरकारलाई सुझाव दिनुभयो।

उहाँले विपद् व्यवस्थापन, उद्धार, राहत तथा पुनर्निर्माणका काममा सबै पक्षलाई सहभागी गराएर राष्ट्रिय सहमति कायम गर्नुपर्नेमा जोड दिनुभयो।