काठमाडौं, असोज ६ । प्रधानमन्त्री बालेन्द्र शाह संयुक्त राष्ट्रसंघको ८१औँ महासभाको उच्चस्तरीय सत्रमा सहभागी हुन आज अमेरिका प्रस्थान गर्दै हुनुहुन्छ ।

प्रधानमन्त्री शाह नेपाली प्रतिनिधिमण्डलको नेतृत्व गर्दै न्युयोर्क जान लाग्नुभएको हो । संयुक्त राष्ट्रसंघको महासभाको उच्चस्तरीय छलफल असोज ६ गतेदेखि सुरु हुँदैछ ।

प्रधानमन्त्री शाहले असोज ८ गते अर्थात् सेप्टेम्बर २४ मा महासभाको सामान्य बहसलाई सम्बोधन गर्ने कार्यक्रम छ । उहाँले महासचिव एन्टोनियो गुटेरेससँग भेटवार्ता गर्ने कार्यक्रमसमेत रहेको परराष्ट्र मन्त्रालयले जनाएको छ ।

यसपटकको सहभागितामा नेपालका समसामयिक राष्ट्रिय तथा अन्तर्राष्ट्रिय विषयसँगै जलवायु परिवर्तनका असर र भोटेकोशी बाढीबाट भएको क्षतिका विषय अन्तर्राष्ट्रिय समुदायसमक्ष प्रस्तुत गर्ने तयारी गरिएको छ । प्रधानमन्त्री शाहले भोटेकोशी विपद्बाट नेपालमा परेको प्रभावबारे राष्ट्रसंघको ध्यानाकर्षण गराउने तयारी रहेको यसअघि पनि सार्वजनिक भएको थियो ।

परराष्ट्रमन्त्री शिशिर खनाल भने यसअघि नै न्युयोर्क पुगिसक्नुभएको छ । उहाँले महासभाका उच्चस्तरीय बैठक, साइड इभेन्ट तथा विभिन्न देशका समकक्षीसँग द्विपक्षीय भेटवार्ता गर्ने कार्यक्रम रहेको परराष्ट्र मन्त्रालयले जनाएको छ ।

प्रधानमन्त्री शाह असोज १० गते नेपाल फर्किने कार्यक्रम रहेको छ ।