काठमाडौं, असोज ७ । नेकपा एमालेका सचिव महेश बस्नेतले पार्टीभित्रका असहमति, मतभेद र विवादलाई मिडिया तथा सामाजिक सञ्जालमार्फत सार्वजनिक गर्ने प्रवृत्ति रोक्नुपर्ने बताउनुभएको छ।

एमाले केन्द्रीय कमिटी बैठकमा बुधबार धारणा राख्दै सचिव बस्नेतले पार्टीभित्र आलोचना र असहमति राख्न पाइने भए पनि त्यसलाई तथ्यसहित र विधिसम्मत रूपमा सम्बन्धित कमिटीमा बहस गर्नुपर्ने बताउनुभएको हो।

उहाँले पार्टीको आन्तरिक बहसलाई मिडियाको विषय बनाउने प्रवृत्तिले पार्टीको संस्थागत प्रतिष्ठा, कार्यकर्ताको मनोबल र जनविश्वासमा असर पारिरहेको बताउनुभयो। त्यसका लागि पार्टीले स्पष्ट आचारसंहिता बनाउनुपर्ने र आवश्यकताअनुसार कारबाहीको विषयसमेत बनाउनुपर्ने उहाँको भनाइ छ। ‘पार्टीको आन्तरिक बहसलाई मिडियाको विषय बनाउने प्रवृत्तिबारे पार्टीले स्पष्ट आचारसंहिता बनाउनुपर्छ र आवश्यकताअनुसार कारबाहीको विषय बनाउनुपर्छ,’ बस्नेतले भन्नुभयो।

उहाँले पार्टी र नेतृत्वको रक्षा गर्नु गलत तथा नेतृत्वलाई कमजोर बनाउनु नै क्रान्तिकारी कदम हो भन्ने भाष्य निर्माण गर्न खोजिएको भन्दै त्यसप्रति सचेत हुनुपर्ने बताउनुभयो। गलत देखिए नेतृत्वलाई सचेत गराउने, नेतृत्वलाई स्थापित गर्ने र मतभेदलाई विधिसम्मत संवादबाट समाधान गर्ने संस्कार नै जनवादी केन्द्रीयता तथा जनताको बहुदलीय जनवादको मूल भावना भएको उहाँले उल्लेख गर्नुभयो।

सचिव बस्नेतले अध्यक्ष केपी शर्मा ओलीले प्रस्तुत गर्नुभएको राजनीतिक प्रतिवेदनमा आवश्यक सुझाव समेटेर त्यसलाई थप समृद्ध बनाउँदै पारित गर्नुपर्ने धारणा राख्नुभयो। कठिन राजनीतिक परिस्थितिमा अध्यक्ष ओलीले राष्ट्रिय स्वाधीनता, संविधानको रक्षा, लोकतान्त्रिक गणतन्त्रको सुदृढीकरण तथा विकास र समृद्धिको एजेन्डा अघि बढाउनुभएको उहाँको भनाइ थियो।

उहाँले पार्टीको पुनर्गठनलाई नेतृत्व परिवर्तनसँग जोड्न नहुने पनि स्पष्ट पार्नुभयो। पुनर्गठन भनेको पार्टी सुधार, संगठन सुदृढीकरण, कार्यशैलीमा सुधार तथा जनसम्बन्ध विस्तार भएको उहाँले बताउनुभयो।

आगामी स्थानीय तथा प्रदेश तहको निर्वाचनलाई लक्षित गर्दै संगठन, नीति र नेतृत्वलाई थप बलियो बनाउनुपर्नेमा जोड दिँदै बस्नेतले विचार मिल्ने वामपन्थी दलहरूसँग कार्यगत एकता र सहकार्य गर्दै गुमेको जनमत फिर्ता ल्याउने दिशामा अघि बढ्नुपर्ने बताउनुभयो।

वर्तमान सरकारका कामकारबाहीविरुद्ध एमालेले जनताका मुद्दा उठाउनुपर्ने उहाँको भनाइ थियो। महँगी, भ्रष्टाचार तथा विपद् व्यवस्थापनमा देखिएका कमजोरीलाई जनतासमक्ष लैजानुपर्ने बताउँदै उहाँले लोकतन्त्र, संविधान, विधिको शासन र जनअधिकारको रक्षाका लागि पार्टी कमिटी, नेता–कार्यकर्ता तथा जनसमुदायलाई संगठित गर्नुपर्ने धारणा राख्नुभयो।

भोटेकोशीमा भएको विपत्तिका क्रममा खोजी, उद्धार तथा राहतमा खटिएका पार्टी पंक्ति, जनसंगठन र स्वयंसेवकहरूलाई धन्यवाद दिँदै बस्नेतले स्थानीय कमिटीहरूले पार्टी कोषमा जम्मा गर्ने भनिएको १ करोड २० लाख रुपैयाँ तथा ५०० अस्थायी टहरा निर्माण गर्ने प्रतिबद्धता कार्यान्वयनमा सबैले भूमिका खेल्नुपर्ने बताउनुभयो।

पार्टीभित्र रणनीति र कार्यनीतिका विषयमा बहस गर्ने सार्वभौम थलो महाधिवेशन भएको उल्लेख गर्दै बस्नेतले केन्द्रीय कमिटी बैठकमा फरक दस्तावेज प्रस्तुत गर्नुभन्दा विधान र बैठकको कार्यविधिअनुसार फरक मत राख्नुपर्ने बताउनुभयो। ‘रणनीति र कार्यनीतिका विषयमा बहस गर्ने सार्वभौम थलो महाधिवेशन हो, केन्द्रीय कमिटीको बैठकमा फरक दस्तावेज राख्ने होइन, निर्णयमा फरक मत भए पार्टीको विधान र बैठकको कार्यविधिअनुसार राख्नुपर्छ,’ उहाँले भन्नुभयो।