एजेन्सी, १५ भदौ । ताइवानदेखि लद्दाखसम्म तनाव भए पनि चीनका राष्ट्रपति सी जिनपिङ अहिले देशका संस्थापक नेता माओत्सेतुङको बाटोमा अघि बढेको देखिएका छन् । चीनको सत्तारुढ कम्युनिष्ट पार्टीले आगामी अक्टोबर १६ मा आफ्नो २०औँ पार्टी महाधिवेशन आयोजना गर्ने भएको छ ।

यस महत्वपूर्ण बैठकमा सी जिनपिङलाई माओपछिको सबैभन्दा शक्तिशाली नेता चुनिने बताइएको छ । कम्युनिष्ट पार्टीको यो बैठक चीनको अर्थतन्त्रले श्वास फेर्न थालेको र अमेरिकासँगको तनाव बढिरहेको बेला आयोजना गरिएको हो । यति मात्र होइन, जहाँ सी जिनपिङको अत्यन्त क्रूर शून्य कोभिड नीतिका कारण चीन विश्वबाट सम्पर्कविच्छेदजस्तै छ, चिनियाँ जनता पनि यसबाट त्रसित छन् । कम्युनिष्ट पार्टीको यो बैठकले सी जिनपिङको तेस्रो कार्यकालका लागि बाटो खुल्ने विश्वास गरिएको छ ।

वर्तमान युगमा चिनियाँ नेतालाई तेस्रो कार्यकाल दिनु आफैमा अप्रत्याशित भएको विश्लेषकहरू बताउँछन् । यसका साथै बैठकमा चीनको नयाँ शीर्ष नेतृत्व पनि चयन गर्न सक्दछ । तर, सी जिनपिङले पार्टीमा आफ्नो पकड बलियो बनाएका छन् र देशका संस्थापक माओ त्सेतुङ पछि सबैभन्दा शक्तिशाली नेता बन्ने रणनीतिमा छन् ।

चीनको सरकारी टेलिभिजन सीसीटीभीका अनुसार प्रत्येक पाँच वर्षमा हुने कम्युनिष्ट पार्टीको यो बैठक ‘अत्यन्तै महत्वपूर्ण’ छ, जसमा पोलिटब्युरोका २५ सदस्य सहभागी हुन्छन् । बैठकको तयारी तीव्र पारिएको उनले बताए ।

पार्टीमा मतदान मात्र औपचारिकता
उक्त कार्यक्रममा पार्टीका देशभरबाट २३ सय प्रतिनिधि सहभागी हुनेछन् । यी प्रतिनिधिहरूले देशको केन्द्रीय समितिका करिब दुई सय सदस्यहरू चयन गर्नेछन्। वर्तमान केन्द्रीय समितिको अन्तिम बैठक असोज ९ गते बस्ने प्रतिवेदनमा उल्लेख छ ।

त्यसपछि केन्द्रीय समितिले २५ सदस्यीय पोलिटब्युरो र यसको शक्तिशाली स्थायी समितिको लागि मतदान गर्नेछ। स्थायी समिति चीनको सर्वोच्च नेतृत्व र सबैभन्दा शक्तिशाली निकाय हो। हाल यो समितिमा ७ जना सदस्य रहेका छन् ।

यसमा मतदान औपचारिकता मात्रै भएको र पोलिटब्युरो र त्यसका लागि सदस्य छनोट भइसकेको विज्ञहरू बताउँछन् । पार्टीको यो बैठक कति दिनसम्म चल्ने भन्ने टुंगो लागेको छैन । विज्ञहरूका अनुसार बैठकमा अप्रत्याशित केही हुने छैन ।

सिंगापुरमा चिनियाँ राजनीतिका विज्ञ अल्फ्रेड वु मुलुआनले भने, ‘सी जिनपिङलाई तेस्रो कार्यकाल दिइएकोमा धेरैजसो मानिसहरू आश्चर्यचकित हुनेछैनन् । म बुझ्छु कि यो पहिले नै तय भइसकेको विषय हो । सी जिनपिङले पोलिटब्युरोमा आफ्ना समर्थकहरूको संख्या बढाउनेछन्, विशेष गरी फुजियान र झेजियाङमा जहाँ उनले पहिले उच्च पदहरू सम्हालेका थिए।

त्यसपछि उनले आफ्नो चौथो र पाँचौं कार्यकालका लागि यी सदस्यहरूबाट समर्थनको अपेक्षा गर्न सक्छन्।

सी जिनपिङ र छिमेकमा तनाव
अल्फ्रेड वुले पार्टी बैठकमा सी जिनपिङलाई ‘महान नेता’को उपाधि दिन सक्ने सम्भावना रहेको बताए । पछिल्लो पटक यो उपाधि माओलाई दिइएको थियो । पिपुल्स डेली जस्ता चीनको प्रचार प्रसार गर्ने सरकारी पत्रिकाहरूले सी जिनपिङलाई ‘जनताको नेता’ भन्न थालेका छन्।

उनले भदौमा दुई सातासम्म बसेको गोप्य बैठकमा कम्युनिष्ट पार्टीले शीर्ष नेतृत्व चयन गरेको बताए । सी जिनपिङको दशक लामो कार्यकाल भ्रष्टाचारविरुद्धको कारबाहीका लागि परिचित छ।

विश्लेषकहरू भन्छन् – सी जिनपिङले यसमार्फत आफ्ना राजनीतिक विरोधीहरूसँग व्यवहार गरे। उनले हङकङमा भएको विरोध प्रदर्शनलाई पनि क्रुरतापूर्वक कुल्चेका थिए। सि जिनपिङले सिनजियाङ प्रान्तमा उइगर मुस्लिममाथि गरेको दमनका लागि विश्वभर आलोचना भइरहेको छ ।

उसको वुल्फ वारियर कूटनीतिका कारण चीन पश्चिमबाट अलगथलग भएको छ र अब रुससँग सम्बन्ध सुदृढ गर्दैछ ।