काठमाडौं, फागुन ९। वाकिटकी लगायतका रेडियो उपकरणहरु अब लाइसेन्स तथा अनुमति नलिई आयात, बिक्री वितरण तथा प्रयोग गर्ने नपाइने भएको छ ।

सञ्चार तथा सूचना प्रविधि मन्त्रालयको सूचना तथा प्रसारण विभागले लाइसेन्स तथा अनुमति नलिई वाकिटकी लगायतका रेडियो उपकरणहरु आयात, बिक्री वितरण तथा प्रयोग गर्ने कार्य तत्काल बन्द गराएको छ ।

विभागले सोमबार सूचना जारी गरी वाकिटकी लगायतका रेडियो उपकरणहरु विक्री बितरण तथा प्रयोग गर्न लाइसेन्स लिनुपर्ने उल्लेख गरेको छ । सूचना प्रकाशित भएको ३५ दिन भित्र नियमानुसारको लाइसेन्स लिएर मात्र प्रयोग गर्न विभागले भनेको छ ।

लाइसेन्स नलिई प्रयोग गरिएको पाइएमा प्रचलित कानून बमोजिम कारबाही हुने चेतावनी पनि विभागले दिएको छ ।