काठमाडौं । बलिउड अभिनेता सलमान खानलाई मार्ने धम्की दिने व्यक्तिलाई प्रहरीले पक्राउ गरेको छ । सोमबार अभिनेतालाई घरमै घुसेर मार्ने र कारलाई बमले उडाइदिने धम्की आएको थियो । धम्की वडोदरा नजिकैको एउटा गाउँबाट पठाइएको थियो । सन्देश पठाउने व्यक्ति २६ वर्षका भएको बताइएको छ । अप्रिल १४ मा उनले मुम्बईको वर्ली क्षेत्रमा रहेको यातायात विभागको आधिकारिक व्हाट्सएप नम्बरमा एउटा सन्देश पठाएका थिए, जसमा सलमान खानलाई उनको घर भित्रै घुसेर मारिने अनि कारलाई बमले उडाइनेछ भनेर लेखिएको थियो ।

छोराको मानसिक सन्तुलन ठीक नभएको परिवारको दाबी 

रिपोर्टका अनुसार सन्देश पठाउने व्यक्तिको मानसिक अवस्था राम्रो नभएको अनुसन्धानबाट पत्ता लागेको छ । उनको उपचार भइरहेको दाबी संदिग्धको परिवारले गरेको छ । यो तथ्य पत्ता लगाउन प्रहरी अनुसन्धान गरिरहेको छ । पछिल्लो समय सलमानलाई ज्यान मार्ने धम्की निकै आइरहेको छ । गएकोको वर्षको अप्रिलमा अभिनेताको घरबाहिर गोलीबारी समेत भएको थियो ।