काठमाडौं, ९ जेठ ।  नेकपा एमाले धनुषाको अध्यक्षमा भोला यादव निर्वाचित हुनुभएको छ। भोलाले ४०२ मत ल्याएर निर्वाचित हुँदा उहाँका प्रतिस्पर्धी लक्ष्मीनारायण यादवले मात्र २०० मत पाउनुभएको छ । पार्टीको उपाध्यक्षमा तेजनारायण यादव ४३० मत ल्याएर निर्वाचित हुनुभएको छ भने प्रतिस्पर्धी जयप्रकाश सुनरैतले मात्र १६० मत पाउनुभएको  छ । यस्तै सचिवमा दिपनारायण ठाकुर विजयी हुनुभएको छ भने  प्रतिस्पर्धा गरेका धिरेन्द्र मण्डलले २२५ मत प्राप्त गर्नुभयो । यस्तै पुरुषतर्फ उपसचिवमा ३८० मतसहित सबिन विक्रम थापा र महिलातर्फ उपसचिवमा ३९१ मतसहित रुपाकुमारी मिश्रा निर्वाचित हुनुभएको छ  । पुरुषतर्फका प्रतिस्पर्धी हरिकिशोर यादव १९५ र महिलातर्फ किरण कापर १८४ मत पाएको निर्वाचन समितिले जनाएको छ ।

यस्तै लेखा समिति अध्यक्षमा वीरेन्द्र लाल कर्ण ३६५ मत ल्याएर निर्वाचित हुँदा उहाँका प्रतिस्पर्धी अनिल कुमार यादव मात्र २०७ मत प्राप्त गर्नुभएको  छ । पाँच पदाधिकारीसहित १३५ सदस्यीय जिल्ला कमिटी चयन गर्न चुनाव भएको थियो । ६२८ मतदातामध्ये ६१५ मतदाताले मतदान गरेका थिए । सदस्यहरूको परिणाम घोषणा गर्न बाँकी छ । उम्मेदवारको विषयमा विवाद भएपछि मतदानको अन्तिम तयारी भइसकेको अवस्थामा वैशाख २३ मा दुई समूहबीच कुटाकुट भएको थियो ।