लमजुङ, पुस ३ । सञ्चार तथा सूचना प्रविधिमन्त्री पृथ्वीसुब्बा गुरूङले मुलुक सङ्कटमा पर्दा नेपालका ठूला दल नेपाल नेकपा र नेपाली कांग्रेस सधैँ एकजुट भएर निकास दिँदै आएको बताउनु भएको छ ।
राइनास नगरपालिका–८ तार्कुघाटस्थित वीरभक्ति माध्यमिक विद्यालयको ५७औँ वार्षिकोत्सव तथा ५१औँ अभिभावक दिवसका अवसरमा आज आयोजित कार्यक्रमलाई सम्बोधन गर्दै उहाँले यस्तो बताउनु भएको हो । उहाँले अहिलेको गठबन्धन सरकार ढलिहाल्छ कि भन्ने भ्रमबाट मुक्त हुन सवैलाई आग्रह पनि गर्नुभयो ।
सरकारका प्रवक्तासमेत रहनुभएका मन्त्री गुरूङले भन्नुभयो, ‘तपाईंहरूलाई धेरै भ्रम फैलाइएको छ होला, कि सरकार फेरिन्छ, भनेर । मन्त्रीहरू फेरबदल हुन सक्लान तर, कांग्रेस र एमालेको सरकार रहिरन्छ, कोही कसैले भ्रम नपाल्दा हुन्छ ।’ प्रधानमन्त्री केपी शर्मा ओली दुई वर्ष प्रधानमन्त्री समय पूरा भएपछि कांग्रेस सभापति शेरबहादुर देउवा प्रधानमन्त्री बन्ने भन्दै २०८४ को चुनावसम्म गठबन्धन सरकारबीचको यो समझदारीमा तलमाथि नहुने बताउनु भयो ।
“हाम्रो यो गठबन्धनको सरकार तीनै वर्ष चल्छ”, मन्त्री गुरुङले भन्नुभयो, “विसं २०८४ को चुनाव सम्पन्न गरेर मात्रै यो सरकार आ–आफ्नो बाटो लाग्छ ।” नेपालमा अस्थिरता ल्याउन चाहने शक्तिहरूले सरकारको उद्देश्य बिथोल्न जनतामा भ्रम छर्दै गरेको बताउँदै उहाँले त्यस्ता भ्रममा नपरी वर्तमान सरकारप्रति विश्वस्त हुन जनतासमक्ष आग्रह गर्नुभयो ।
सबै पालिका र वडामा इन्टरनेट सुविधा र टेलिफोनको व्यवस्था पुर्याउने कार्य गर्दै सञ्चारमन्त्री गुरूङले पुराना कानुन र ऐन संशोधन गर्ने, सामाजिक सञ्जाल नियमन ऐन, साइबर सुरक्षा ऐन, शिक्षा ऐनलगायत थुप्रै नयाँ ऐन ल्याउन लागिएकोसमेत जानकारी दिनुभयो ।
प्रतिक्रिया दिनुहोस्