काठमाडौं, माघ ११ । कोरोना भाइरस (कोभिड–१९) ले विकास आयोजनाहरूलाई केही समय प्रभावित बनाए पनि कालीगण्डकी करिडोर दाना–खुर्कोट प्रसारण लाइन परीक्षण सम्पन्न भएको छ । शुक्रबारदेखि परीक्षण थालिएकोमा खुर्कोट सबस्टेसन र प्रसारण लाइनको परीक्षण सफल भएको हो ।

दाना सबस्टेसनको परीक्षण भने जारी रहेको नेपाल विद्युत् प्राधिकरणले जनाएको छ । प्राधिकरण आयोजना व्यवस्थापन निर्देशनालय प्रमुख मनोज सिलवालका अनुसार तल्लो मोदीबाट १३२ केभी क्षमतामा विद्युत सबस्टेसन चार्ज गरिएको थियो । सबस्टेसनमा रहेका ट्रान्सफर्मरहरूको क्रमिक चार्जपछि १३२ लाई २२० केभीमा रूपान्तरण गरेर प्रसारण लाइनको परीक्षण गरिएको थियो । दुवै परीक्षण सफल भएपछि अहिले म्याग्दीको दानामा रहेको सबस्टेसन चार्ज थालिएको हो ।

पुसको दोस्रो साता म्याग्दीको दाना सबस्टेसन, पर्वतको खुर्कोट सबस्टेसन र बीचमा ११० टावर तथा ३९.६ किलोमिटर तार टाँग्ने सबै काम सकिएको थियो। प्रसारण लाइन तथा सबस्टेसनको नियमित सञ्चालन यसै साता गर्ने तयारीमा प्राधिकरण व्यवस्थापन जुटेको छ । यसपछि घलेम्दी जलविद्युत्को पाँच मेगावाट विद्युत तत्काल राष्ट्रिय प्रसारण प्रणालीमा आउने छ ।

त्यसैगरी थापाखोला जलविद्युत् आयोजनाको १३.५ मेगावाट विद्युत् पनि प्रणालीमा आउने छ । सबस्टेसनसम्म विद्युत् पुर्याउन थापाखोलाले अन्तिम तयारी गरिरहेको छ । त्यस्तै ४२ मेगावाट क्षमताको मिस्त्रिखोला जलविद्युतले पनि एक महिनामा विद्युत् जोड्ने लक्ष्यसहित काम गरिरहेको छ । निर्माणाधीन ४० मेगावाट क्षमताको रहुघाटको विद्युत आयोजना पनि यसले राष्ट्रिय प्रसारण लाइनमा ल्याउने छ ।

यस आयोजना निर्धारित समयभन्दा दुई वर्ष ढिला सम्पन्न भएको हो । एसियाली विकास बैङ्क (एडीबी) को सासेक पावर सिस्टम एक्सपान्सन कार्यक्रमअन्तर्गत सन् २०१६ मा निर्माण थालिएको यो दुई सबस्टेसन तथा प्रसारण लाइन सम्पन्न भइसक्दा तीन अर्ब रुपियाँ खर्च भएको नेपाल विद्युत् प्राधिकरणले जनाएको छ । प्राधिकरणले टाटा प्रोजेक्ट इन्डिया र चिन्ट इलेक्ट्रिक चीन जेभीलाई ठेक्का दिएको थियो ।

विद्युत् आपूर्तिको यो २२० केभी डबल सर्किट यो प्रसारण लाइनमा ट्विन मोज कन्डक्टर तार प्रयोग गरिएको छ । ‘डबल सर्किट’ प्रसारण लाइन भएकाले यसबाट एक हजार दुई सय मेगावाटसम्म बिजुली प्रवाह गर्न सकिन्छ तर एउटा सर्किट आपत्कालीन सञ्चालनका लागि राखिने भएकाले यसबाट सामान्यतया छ सय मेगावाटसम्म विद्युत् प्रवाह हुने प्राधिकरणले जनाएको छ । दाना–खुर्कोट प्रसारण लाइनसहित नवलपरासीको बर्दघाटसम्म पुर्याउने गरी १४३ किलोमिटर लामो कालीगण्डकी करिडोर प्रसारण लाइन निर्माणाधीन छ ।

बिद्युत प्राधिकरणका निवर्तमान कार्यकारी नर्देशक कलमान घिसिङले आफ्नै पालामा सम्पन्न गर्न खोजेको यो अयोजना उहाँको पालामा संभव नभए पनि बिद्युत प्राधिकरणको बर्तमान नेतृत्वले संभव बनाएको हो । आयोजनामा देखिएको केही त्रुटीलाई सच्याएर टीमवर्कका आधारमा यो परिणाम आएको हो ।