पोखरा, माघ २२। गण्डकी प्रदेशका पूर्व मुख्यमन्त्री एवम नेकपा (एमाले) का उपमहासचिव पृथ्वीसुब्बा गुरुङले गण्डकी प्रदेशसभाले विगतमा संघीयताको जग बसाल्न महत्वपूर्ण काम गरेको बताउनुभएको छ । शनिबार गण्डकी प्रदेशसभाको वार्षिक उत्सवका अवसरमा शुभकामना दिँदै गुरुङले यस्तो बताउनुभएको हो ।

‘गण्डकी प्रदेश सभाले ४ वर्ष बिताएको छ,’ एमाले प्रदेशसभा संसदीय दलका नेता समेत रहेका गुरुङले भन्नुभएको छ , ‘पहिलोपटक प्रदेश सभाका सदस्य बनेका हाम्रा काम संघीयता कार्यान्यनमा जग राख्नु थियो, त्यसमा गण्डकी प्रदेश सभाले धेरै मिहिनेत गरेर उल्लेखनीय उपलब्धिहरु हाँसिल गरेको छ ।

यी उपलब्धिहरु नेपालको आधुनिक इतिहासका महत्वपूर्ण कडी पनि हुन् । हाम्रा उपलब्धिहरुको दस्तावेजीकरण गर्नु जरुरी छ ।’ उहाँले आफ्नो बाटो आफैं निर्माण गरेर अघि बढ्ने चुनौती भएको बताउनुभयो ।

आफूले चुनौती पार गरेको भन्दै आफूलाई गौरवबोध हुने उहाँले बताउनुभयो । ‘२०७५ साल असार १८ गते सर्वसम्मत प्रदेश राजधानी पोखरालाई तोक्न र असार २२ मा प्रदेशको नामाकरण गण्डकी राख्न सफल भयौं,’ उहाँ भन्नुभयो, ‘गण्डकी प्रदेशसभालाई सत्ता र प्रतिपक्षीको साझा दायित्वका रुपमा बुझेर नै समझदारी, समन्वय र सन्तुलनबाट अघि बढाएको क्षणको स्मरण गर्दा मात्रैपनि मलाई गौरवबोध हुन्छ ।’ उहाँले कतिपय दलका कारण जनतामा संघीयता प्रति नकारात्मक धारणा विकास भएको बताउनुभयो ।