काठमाडौं, १२ असार । अमेरिकी राष्ट्रपति डोनाल्ड ट्रम्पले इरानले युद्धपछिको घाटाबाट उठ्न तेल बेच्नु आवश्यक रहेको बताएका छन् ।

बुधबार नेदरल्याण्ड्समा भएको नाटो शिखर सम्मेलनमा उनले इरानले युद्धपछिको घाटाबाट उठ्न तेल बेच्नु आवश्यक रहेको भन्दै चीनले इरानबाट तेल किन्न चाहन्छ भने आफूहरुलाई कुनै समस्या नरहेको बताएका हुन् ।

उनले भने, ‘इरानले इजरायलसँगको युद्धमा बहादुरी देखाएको छ । तिनीहरूले तेलको व्यापार गर्छन् । म चाहे भने यसलाई रोक्न सक्छु, तर म त्यसो गर्न चाहन्न । यदि चीनले इरानबाट तेल किन्न चाहन्छ भने हामीलाई कुनै समस्या छैन । इरान र अमेरिकाबीच अर्को हप्ता वार्ता हुनेछ ।’

राष्ट्रपति ट्रम्पले नाटोले सुरक्षा खर्च पाँच प्रतिशतले बढाउनुलाई ठूलो जितको रूपमा व्याख्या समेत गरेका छन् । उनले लगातार एक महिनादेखि दिएको दबाबका कारण नाटोका नेता सन् २०४६ देखि लागु हुनेगरी सुरक्षा खर्चमा पाँच प्रतिशतले वृद्धि गर्ने कुरामा सहमत भएका हुन् ।