काठमाडौं, कात्तिक १४ । नेकपा (एकीकृत समाजवादी) का सम्मानित नेता झलनाथ खनालले अध्यक्ष माधवकुमार नेपालले पार्टीलाई माओवादी केन्द्रमा मिसाउने निर्णय गरेपछि नयाँ पार्टी खोल्ने घोषणा गर्नुभएको छ ।

आज बसेको केन्द्रीय समिति बैठकले नेकपा (माओवादी केन्द्र) सँग पार्टी एकता गर्ने निर्णय गरेपछि त्यसप्रति असहमति जनाउँदै खनालले अब आफूहरू नयाँ ढङ्गले अघि बढ्ने बताउनुभएको हो । उहाँले भन्नुभयो, ‘यदि कानुनी रूपमा मिल्ने अवस्था भयो भने एकीकृत समाजवादीकै नाममा अघि बढ्छौँ, नभए नयाँ पार्टी बनाएर अघि बढ्नेछौँ।’

खनालका अनुसार बैठकमा आफूलाई बोल्ने अवसर समेत नदिई एकलौटी ढङ्गले निर्णय लिइएको छ । उहाँले उक्त निर्णय प्रक्रियाप्रति आपत्ति जनाउँदै आफ्नो फरक मतका ३० बुँदा बैठकमा पेस गरेको जानकारी दिनुभयो ।

अध्यक्ष नेपालको नेतृत्वमा माओवादीसँग पार्टी एकता गर्ने निर्णय भएपछि नेतृ रामकुमारी झाँक्री, डा. जगन्नाथ खतिवडा, घनश्याम भुसाललगायत नेताहरूले पनि त्यसको विरोध गर्दै वैचारिक रूपान्तरण र पुनर्गठनबिना हुने एकतामा सहभागी नहुने बताएका छन् ।

खनालले गरेको नयाँ पार्टीको घोषणा र झाँक्री समूहको कडा प्रतिक्रियासँगै एकीकृत समाजवादीभित्र गम्भीर मतभेद सतहमा आएको छ । विश्लेषकहरूका अनुसार, यसले पार्टी दुई धारमा विभाजित हुँदै नयाँ राजनीतिक पुनर्संरचनाको सुरुवात गर्ने सङ्केत गरेको छ ।