सिंहदरबारस्थित सभामुखको कार्यालयमा आज भएको छलफलमा सदनको कामकाजलाई कसरी प्रभावकारी बनाउने भन्ने विषयमा केन्द्रित बहस भएको सहभागीहरूले बताएका छन्।

बैठकमा दलका प्रमुख सचेतक र सचेतकहरू साझा उद्देश्यका आधारमा सहकार्य आवश्यक रहेको बताउनुभयो। उहाँहरूले संसद् रोकेर अध्यादेश ल्याउन ठिक नभएको बताउनुभएको थियो ।

छलफलमा संसद् अधिवेशन चाँडै बोलाउनुपर्ने विषय उहाँहरूले उठाउनु भएको थियो। उक्त विषयमा सभामुख अर्यालले भोलिसम्म निर्णय हुने जवाफ दिनुभएको छ ।

संसद् अधिवेशन कहिले बोलाउने भन्नेबारे अन्योल कायम रहेका बेला सभामुखले दलहरूसँग छलफल  अघि बढाउनुले अब संसद् बैठक बस्ने सम्भावना बढेको छ । सङ्घीय संसदकाे बजेट अधिवेशन सुरु हुन ढिला भइसकेको छ । सरकार भने अधिवेशन रोकेर अध्यादेश ल्याइरहेको छ ।