काठमाडौं, जेठ ८। राष्ट्रिय स्वतन्त्र पार्टी (रास्वपा) का सांसदहरूले  पार्टी सभापति रवि लामिछानेसँग सामूहिक भेटघाट तथा छलफल  गर्ने भएका छन्।

संसद अवरोध, समसामयिक राजनीतिक अवस्था र आगामी बजेटलाई केन्द्रमा राखेर प्रदेशगत रूपमा छलफलको तालिका बनाइएको पार्टीले जनाएको छ । रास्वपा प्रवक्ता मनिष झाका अनुसार सांसदहरूबाट प्राप्त सुझाव, गुनासा र क्षेत्रगत मुद्दाका आधारमा सभापति लामिछानेले प्रत्यक्ष छलफल गर्ने कार्यक्रम तय गरिएको हो ।

सोही क्रममा शुक्रबार कोशी र मधेश प्रदेशका सांसदहरूसँग छलफल हुने भएकाे छ।  कोशी प्रदेशका सांसदहरूसँग बिहान ११ बजेदेखि दिउँसो १ बजेसम्म तथा मधेश प्रदेशका सांसदहरूसँग दिउँसो साढे १ बजेदेखि साढे ३ बजेसम्म छलफलको कार्यक्रम राखिएको छ ।

विपक्षी दलहरूले प्रधानमन्त्री संसदमा उपस्थित हुनुपर्ने मागसहित लगातार प्रतिनिधिसभा बैठक अवरुद्ध गरिरहेका बेला रास्वपाले आन्तरिक छलफललाई तीव्र बनाएको हो । पछिल्लो राजनीतिक परिस्थिति, संसदको गतिरोध तथा पार्टीको रणनीतिबारे सांसदहरूबीच धारणा आदानप्रदान हुने जनाइएको छ ।

त्यस्तै आगामी आर्थिक वर्षको बजेट सार्वजनिक हुनुअघि हुने यस छलफलमा सांसदहरूले आफ्ना निर्वाचन क्षेत्रका समस्या, विकास आयोजना, जनचासोका विषय तथा बजेट प्राथमिकताबारे पनि सभापतिलाई जानकारी गराउने कार्यक्रम रहेको बताइएको छ ।