काठमाडौं, माघ ३०

सीमा सुरक्षामा खटिएको सशस्त्र प्रहरीले नेपाली भूमिबाट अवैध रुपमा बालुवा उत्खनन गर्ने समुहमाथी कारवाही शुरु गरेको छ । नेपाली भूमिमा प्रवेश गरेर बालुवा उत्खनन गरिरहेका भारतीय बालुवा तस्करसँग सशस्त्र प्रहरीको झडप भएको छ । झडपका क्रममा दुईजना सशस्त्र प्रहरी घाइते भएका छन् ।

२४ वर्षीय आयुष राय यादव र अन्दाजी २५ वर्षीय महेश यादव घाइते भएका हुन् । उनीहरुको नारायणी अस्पतालमा उपचार भइरहेको छ । नरेशको देब्रे हातको हड्डी भाँचिएको र खुट्टामा चोट लागेको छ । ओरिया खोलामा बालुवा उत्खनन गरेर लैजादै गरेको भारतीय ट्याक्टरलाई नियन्त्रणमा लिने क्रममा उनी घाइते भएको सशस्त्र प्रहरीले जनाएको छ ।

यसरी बालुवा चोरी गरिरहेका थिए

पर्सा जिल्लाको जगरनाथपुर गाउँपालिका–१ पिपलाडी बिसनपुर रहेको ओरिया खोलाबाट भारतीय पक्षले एकतर्फीरूपमा अवैध बालुवा उत्खनन् गर्न निक्कै पहिलादेखी थालेका थिए । उनिहरुले वार्षिक सात करोड मूल्य बराबरको बालुवा लग्ने गरेको स्थानीयको भनाई छ । दैनिक एक हजारभन्दा बढी भारतीय ट्र्याक्टर अबैध रूपमा खोलामा पसेर जथाभावी बालुवा उत्खनन् गर्दा वातावरणसमेत प्रभावित भएको स्थानीयवासीहरूको आरोप छ । खोला नजिकै सशस्त्र प्रहरी बल नेपाल बोर्डर आउट पोस्ट र प्रहरीचौकीसमेत रहेको थियो ।

विगत २० वर्षदेखि सो खोलाको स्वामित्वका बारेमा दुईदेशबीच विवाद रहेको र भारतीयले खोलाबाट बालुवा निकाल्ने क्रम नरोकिएको जगरनाथपुर गाउँपालिकाका अध्यक्ष जालिम मियाँ मन्सुरीले बताउनु भयो । ‘विगत तीन वर्षदेखि भारतीयलाई खोलाबाट बालुवा निकाल्न रोक लगाएको भए पनि केही दिनयता भारतीयले सो खोलाबाट पुनः अवैधरुपमा बालुवा निकाल्न थालेका छन्’, उहाले भन्नुभयो ।

केही दिनअघि दुई ट्र्याक्टर सशस्त्र प्रहरीले कब्जामा लिएको थियो । वारी पर्साको पिपडाडी गाउँ रहेको छ भने बारी भारतको भंगहा गाउँ रहेको छ र बीचबाट ओरिया खोला बगेको भए पनि भारतले आफ्नो क्षेत्रमा खोला रहेको भनी दाबी गर्दै ठेक्कासमेत लगाउने गरेको छ । प्रमुख जिल्ला अधिकारी आसमान तामाङले समस्याका बारेमा आफूलाई जानकारी भएको र चाँडै नै अनुगमन गरी दोषीमाथि कारबाही गरिने बताउनु भएको थियो ।