काठमाडौँ, २९ असार । ‘केही नेपाल ऐनलाई संशोधन गर्न बनेको विधेयकमाथि राष्ट्रियसभाबाट भएको संशोधनमाथि विचार गरियोस्” भन्ने प्रस्ताव प्रतिनिधिसभाबाट सर्वसम्मतीले स्वीकृत भएको छ । सभामुख देवराज घिमिरेले प्रस्ताव स्वीकृत भएको घोषणा गर्नुभयो । कानून, न्याय तथा तथा संसदीय मामिलामन्त्री अजयकुमार चौरसियाले प्रस्तुत गर्नुभएको उक्त प्रस्तावमाथि सांसदहरु राजेन्द्र बजगाईँ, राजेन्द्रकुमार केसी, महेशकुमार बर्तौला, रञ्जुकमारी झा, रामकृष्ण यादव, पूर्णबहादुर घर्ती, विमला सुवेदी, प्रेम सुवालले भाग छलफलमा लिनुभएको थियो ।

मन्त्री चौरसियाले विधेयकको प्रस्तावमा गरिएको व्यवस्थाबाट प्रचलित कानूनमा रहेको प्राविधिक त्रुटि सुधार हुनुका साथै नेपालको दिगो तथा सन्तुलित विकास, सुशासनको प्रत्याभूति, वातावरण संरक्षण र नागरिकमैत्री शासन कायम गर्ने राज्यको उद्देश्य पूरा गर्न टेवा पुग्ने अपेक्षा गरेको बताउनुभयो । प्रतिनिधिसभाको अर्को बैठक यही असार ३० गते सोमबार दिउँसो १ बजे बस्नेछ ।