काठमाडौं, असाेज ९। बिहीबार सिंहदरबारमा बसेको मन्त्रिपरिषद् बैठकले सञ्चार तथा सूचना प्रविधि मन्त्री जगदीश खरेललाई सरकारका प्रवक्ता नियुक्त गरेको छ । बैठकपछि प्रवक्ता खरेलले पत्रकार सम्मेलनमार्फत बैठकका निर्णयहरूबारे जानकारी दिनुभयो ।

प्रवक्ता खरेलका अनुसार, २०८२ भदौ २३ र २४ गतेको प्रदर्शनका क्रममा ज्यान गुमाएका नेपाली नागरिकका परिवारलाई सरकारले राहत उपलब्ध गराउने निर्णय गरेको छ । प्रदर्शनका क्रममा भाग्ने क्रममा मृत्यु भएका कैदी बन्दी र बाल बन्दीबाहेक, पहिचान खुलेका मृतकका प्रत्येक परिवारलाई १० लाख रुपैयाँ आर्थिक सहयोग दिइनेछ । साथै, काजक्रिया, खानपान र यातायात खर्चका लागि अतिरिक्त ५ लाख रुपैयाँ प्रदान गरिने निर्णय भएको हो ।

बैठकले सुरक्षण मुद्रण सम्बन्धी नियमावली, २०८२ स्वीकृत गरेको छ । सुरक्षित मुद्रण सम्बन्धी ऐन, २०८१ लाई कार्यान्वयनमा ल्याउन आवश्यक कानुनी व्यवस्था मिलाउन यो नियमावली ल्याइएको प्रवक्ता खरेलले जानकारी दिनुभयो ।

त्यस्तै, छापाखाना तथा प्रकाशन ऐन, २०४८ बमोजिम अनलाइन सञ्चारमाध्यम दर्ता तथा नवीकरणको जिम्मेवारी सूचना तथा प्रसारण विभागका महानिर्देशकलाई स्थानीय अधिकारीका रूपमा तोक्ने निर्णय भएको छ । यससँगै अब अनलाइन सञ्चारमाध्यम दर्ता तथा नवीकरण प्रक्रिया जिल्ला प्रशासन कार्यालयमार्फत नभई सूचना विभागमार्फत नै सञ्चालन हुने व्यवस्था कायम भएको छ ।

यसैगरी, प्रधानमन्त्री कार्यालय मातहत रहेका राजश्व अनुसन्धान विभाग र सम्पत्ति शुद्धीकरण अनुसन्धान विभागलाई अर्थ मन्त्रालयको कार्यक्षेत्रमा ल्याउने निर्णय गरिएको छ । त्यस्तै, राष्ट्रिय अनुसन्धान विभागलाई गृह मन्त्रालयको कार्यक्षेत्र मातहतमा ल्याइने निर्णयसमेत बैठकले गरेको छ ।