काठमाडौं, मंसिर ७। प्रगतिशील लोकतान्त्रिक पार्टीका नेता जनार्दन शर्माले नेपालको राजनीति परिवर्तनका प्रमुख शक्ति मानिएका पुराना राजनीतिक दलले राज्यसत्तामा पुगेपछि आफ्नो क्रान्तिकारी छवि जोगाउन नसक्दा मुलुक गम्भीर भ्रष्टाचार, बेथिति र यथास्थितिको दुष्चक्रमा फसेको बताउनुभएको छ ।

आइतबार आयोजित प्रगतिशील लोकतान्त्रिक पार्टीको एकता सभामा बोल्दै शर्माले नेपाली कांग्रेस, नेकपा एमाले र माओवादी केन्द्रले इतिहासमा परिवर्तनकारी भूमिका खेले पनि शासन सत्तामा पुगेपछि जनआकाङ्क्षा अनुसारको रूपान्तरण नदिन नसक्नु नै देश आजको अस्तव्यस्त अवस्थामा पुग्नुको प्रमुख कारण भएको बताउनुभयो । ‘कांग्रेस, एमाले, माओवादी आ–आफ्ना समयका नागरिक आवाजको प्रतिनिधित्व गर्ने परिवर्तनकारी पार्टी नै थिए र हुन् तर इतिहासमा योगदान गरेका पार्टीहरूले राज्यसत्तामा पुगेपछि आफ्नो क्रान्तिकारी छवि बचाउन नसक्दा असफल हुन पुगे, फलस्वरूप देश चरम भ्रष्टाचार, बेथिति र यथास्थितिमा फस्नका साथै गति र परिणामविहीन हुन पुग्यो’, उहाँले भन्नुभयो ।

शर्माले मुलुकका प्रमुख दलले नातावाद–कृपावाद, दण्डहीनता र राजनीतिक हस्तक्षेपलाई संस्थागत रूपमा विस्तार गर्दै राज्यका अङ्गहरूलाई ‘थप निकम्मा र असक्षम’ बनाएको बताउनुभयो। संविधानसभा मार्फत संविधान लेख्ने अवसरलाई दलहरूले दलगत स्वार्थ र सत्ता समीकरणको खेलमै सीमित गरेकाले क्रान्ति र आन्दोलनको म्यान्डेट पूरा हुन नसकेको उहाँले बताउनुभयो । ‘भ्रष्टाचार, नातावाद, कृपावाद, दण्डहीनता र सबै क्षेत्रमा राजनीतिक तरङ्ग गरेर राज्यका संस्थागत प्रणालीलाई थप निकम्मा बनाए, संविधानसभामार्फत संविधान लेख्ने अवसरलाई दलीय स्वार्थ र दलीय दाउपेचको विषय बनाउँदा जनआन्दोलनको म्यान्डेट जस्ताको त्यस्तै सम्बोधन हुन सकेन’, उहाँले भन्नुभयाे ।

प्रगतिशील लोकतान्त्रिक पार्टीले वैकल्पिक राजनीतिक शक्तिको रूपमा परिणाममुखी र उदाहरणीय शासन गर्ने दाबी गर्दै उहाँले वर्तमान राजनीतिक संस्कृति बदल्न आफूहरू प्रतिबद्ध रहेको बताउनुभयाे ।