काठमाडौं, असोज ४ । नेपाली कांग्रेसका सभापति शेरबहादुर देउवाले ८ जनालाई केन्द्रीय सदस्यमा मनोनित गर्नुभएको छ । कांग्रेस विधानको धारा २१ को उपधारा १० बमोजिम सभापति देउवाले बिहीबार ८ जनालाई केन्द्रीय समितिमा मनोनित गर्नुभएको हो ।

मनोनित हुनेमा गुल्मीका डा. चन्द्र भण्डारी, अर्घाखाँचीका मानबहादुर विश्वकर्मा, पर्वतका अर्जुनप्रसाद जोशी, काभ्रेका शिवप्रसाद हुमागाई, बागलुङका किरणराज शर्मा पौडेल, रुपन्देहीका भरतकुमार शाह, कास्कीका शारदा पौडेल र पर्साका अनिलकुमार रुंगटा हुनुहुन्छ ।

मनोनित केन्द्रीय सदस्यमा चन्द्र भण्डारी, हुमागाई र शारदा पौडेल बाहेक अन्य सवै संस्थापन पक्षका नेता हुन । भण्डारी १४ औं महाधिवेशनमा उपसभापतिमा पराजित हुनुभएको थियो भने विश्वकर्माले सहमहामन्त्रीमा पराजित हुनुभएको थियो ।

जोशी, हुमागाईं यस अघि पनि केन्द्रीय सदस्य हुनुहुन्थ्यो । यस्तै किरणराज शर्मा पौडेल यसअघि आमन्त्रित केन्द्रीय हुनुहुन्थ्यो ।