वासिंगटन, १४ मंसिर । अमेरिकाका पूर्वविदेशमन्त्री हेनरी किसिन्जरको एक सय वर्षको उमेरमा निधन भएको छ । किसिन्जरको कनेक्टिकटस्थित आफ्नै निवासमा बुधबार बिहान निधन भएको रोयटर्सले जनाएको छ ।

रिपब्लिकन पार्टीका किसिन्जर सन् १९७३ देखि १९७७ सम्म अमेरिकी विदेशमन्त्री हुनुभएको थियो । भियतनाम युद्धविरामका लागि पहल गरेका कारण सन् १९७३ मा उहाँले नोबेल शान्ति पुरस्कार पाउनुभएको थियो ।

उहाँ अमेरिकी राष्ट्रपति रिचर्ड निक्सनको राष्ट्रिय सुरक्षा सल्लाहकार पनि हुनुहुन्थ्यो । चीनसँग सम्बन्ध विस्तारका लागि उहाँ पाकिस्तानको रावलपिण्डीबाट चीन जानुभएको थियो ।

उहाँले चिनियाँ नेता माओ र राष्ट्रपति निक्सनबीच भेटवार्ता गराउनुभएको थियो जसले चीन–अमेरिका द्वन्द्वलाई अन्त्य गराएको थियो । माओ–निक्सन भेटवार्ता विश्व राजनीतिमा निकै चर्चित छ ।

अमेरिका–चीन शक्ति सन्तुलन कायम राख्न अमेरिकाले पहल गर्नुपर्नेमा जोड दिने किसिन्जरले दुई देशबीच स्थायी सम्वाद पनि आवश्यक रहेको पनि बताउँनुहुन्थ्यो ।