जनता टाइम्स

१२ फाल्गुन २०८०, शनिबार ११:५८

राष्ट्रियसभा अध्यक्ष र उपराष्ट्रपतिको भेट, यस्तो भयो कुराकानी


काठमाडौं, १२ फागुन । राष्ट्रियसभाका अध्यक्ष गणेशप्रसाद तिमिल्सिना र उपराष्ट्रपति रामसहायप्रसाद यादवबिच भेटघाट भएको छ । आज लैनचौरस्थित उपराष्ट्रपतिको कार्यालयमा अध्यक्ष तिमिल्सिनाले शिष्टाचार भेटवार्ता गर्नुभएको बताइएको छ । बिहान भएको भेटमा अध्यक्ष तिमिल्सिनाको कार्यकालमा राष्ट्रियसभाबाट देश र जनताका पक्षमा पारित विधेयक, निर्माण प्रक्रियामा रहेका कानुनलगायत समसामयिक विषयमा छलफल भएको थियो ।

उपराष्ट्रपतिले अध्यक्ष तिमिल्सिनाद्वारा आफ्नो कार्यकालमा निर्वाह गर्नुभएको महत्वपूर्ण भूमिकाका लागि धन्यवाद दिँदै उहाँको सुख, शान्ति, दीर्घ जीवन र सुस्वास्थ्यको कामना गर्दै हार्दिक शुभकामना व्यक्त गर्नुभएको उपराष्ट्रपतिको कार्यालयले जनाएको छ । त्यस अवसरमा अध्यक्ष तिमिल्सिनाले प्रतिनिधिसभा र राष्ट्रियसभामा प्रस्ताव गरिएका महत्पूर्ण विधेयक र कानुन यथाशीघ्र निर्माण गरी कार्यान्वयनमा ल्याउन सबै पक्षबाट सकारात्मक प्रयास हुन जरुरी भएको बताउनुभयो । यहाँको कार्यकाल यही फागुन २० गते पूरा हुँदैछ ।