काठमाडौं, ३१ बैशाख । सत्तारुढ प्रमुख दलका नेताहरु संसदको अवरोधबारे निकास खोज्न सिंहदरबारमा छलफल गरिरहनुभएको छ । प्रधानमन्त्री पुष्पकमल दाहाल ‘प्रचण्ड’, नेकपा एमालेका अध्यक्ष केपी शर्मा ओली र उपप्रधानमन्त्री गृहमन्त्री एवं रास्वपाका सभापतिबीच अहिले छलफल भइरहेको हो ।

बैठकमा नेपाली कांग्रेसले गृहमन्त्री रवि लामिछानेमाथि संसदीय छानबिन समितिको माग राखेर गरिरहेको विरोध र गठबन्धनको भावी कदमका बारेमा छलफल भएको बताइएको छ ।

भोलि राष्ट्रपति रामचन्द्र पौडेलले संघीय संसदको संयुक्त बैठकमा सरकारको नीति तथा कार्यक्रम पेश गर्ने कार्यसूची छ । कांग्रेसका नेताहरूले संसदको गतिरोध अन्त्य सरकारको भूमिकामा निर्भर हुने बताउँदै आएका छन् ।