काठमाडौं, ६ फागुन ।  गोरु तस्करी प्रकरणमा रातोमाटे चौकीका इन्चार्ज कुमार फुयाँलसहित ३ जना प्रहरीलाई जिल्ला प्रहरी कार्यालय मकवानपुरले जिम्मेवारीबाट हटाएको छ । हेटौँडा हुँदै भइरहेको गोरु तस्करी प्रकरणमा छानबिनका लागि चौकी इन्चार्ज सहित प्रहरी सहायक हवलदार विपिन कुशवाह र प्रहरी जवान केशर शाहीलाई जिम्मेवारीबाट हटाइएको हो । जिल्ला प्रहरी कार्यालय मकवानपुरका प्रमुख प्रहरी उपरीक्षक विश्वराज खड्काले ३ जनालाई छानबिनका लागि जिम्मेवारीबाट हटाएर जिल्ला तानेको जानकारी दिनुभयो । उहाँका अनुसार उक्त चौकीको इन्चार्जको रूपमा प्रहरी सहायक निरीक्षकलाई पठाउने गरी निर्णय भएको छ ।

गोरु तस्करी प्रकरणमा प्रहरीको संलग्नताका विषयमा छानबिन गर्न उनीहरूलाई जिल्ला तानेको उहाँले बताउनुभयो । सो विषयमा प्रक्रियागत रूपमा छानबिन कार्य भइरहेको उहाले बताउनुभयो । गए राति चितवनतिरबाट हेटौँडा हुँदै पथलैयातर्फ गोरु बोकेर जाँदै गरेको ट्रकलाई पशु सेवा कार्यालय मकवानपुरले बाराको पथलैयाबाट नियन्त्रणमा लिएको थियो । उक्त घटनामा प्रहरीले नै स्कटिङ गरेर तस्करी भइरहेको गोरु सहितको बा। प्र। ०३–००१ ख १४२४ नम्बरको ट्रक रातोमाटे चौकीबाट भगाएर चुरियामाई नाका कटाएका थिए ।
यता जिल्ला पशु सेवा कार्यालय मकवानपुरले गोरु सहितको ट्रकलाई ५ हजार जरिवाना सहित छाडेको छ । गोरु ढुवानीकर्ता भिष्म राईलाई सम्पर्कमा ल्याएर कार्यालयले मापदण्ड विपरीत गोरुहरू ल्याएको भन्दै कानुन बमोजिम ५ हजार रुपैयाँ जरिवाना गरेको कार्यालयका प्रमुख ब्रजकिशोर ठाकुरले जानकारी दिनुभयो । उहाका अनुसार राईलाई उक्त ट्रक सहितका गोरुहरू ल्याएको स्थानमा नै लगेर छाड्ने गरी व्यवस्थापन गरिएको छ । उक्त घटनामा छानबिन गर्न कार्यालयले आन्तरिक राजस्व कार्यालय र हेटौँडा उपमहानगरपालिकालाई समेत पठाउने गरी प्रक्रिया अघि बढाइएको उहाले बताउनुभयो ।