काठमाडौं, कात्तिक १ । फ्रान्समा बढ्दो महँगी र शिक्षा प्रणालीको अवस्था सुधारको माग गर्दै शनिबार भएको प्रदर्शन हिंसात्मक बनेको छ। प्रदर्शनका क्रममा प्रहरीले कम्तीमा १ हजार २०० जनालाई पक्राउ गरेको फ्रान्सेली सरकारले जनाएको छ।

बीबीसीका अनुसार प्रदर्शनमा करिब ५ लाख ५० हजार मानिस सहभागी भएको अनुमान गरिएको छ। राजधानी पेरिससहित विभिन्न सहरमा प्रहरी र प्रदर्शनकारीबीच झडप भएको थियो। भीड नियन्त्रण गर्न प्रहरीले अश्रुग्यास र पानीको फोहोरा प्रयोग गरेको थियो। हिंसात्मक घटनामा १५० जना प्रहरी घाइते भएको प्रधानमन्त्री सेबास्टियन लेकोर्नुले बताउनुभएको छ।

पेरिसमा प्रदर्शनका क्रममा सवारीसाधन र भवनमा आगजनी हुनुका साथै पसल तथा व्यवसायमा तोडफोड र लुटपाट भएको छ। लिमोज सहरको नगरपालिकाको भवनमा लागेको आगोका कारण छानाको केही भाग भत्किएको स्थानीय अधिकारीहरूले बताएका छन्।

लियोनमा पर्यटक सूचना केन्द्रमा आगजनी भएपछि नगरप्रमुख ग्रेगरी डुसेले घटनालाई सहरका लागि दुःखद बताउनुभएको छ। सेन्ट–एटिएनमा ग्रिनेड विस्फोट हुँदा एक युवकको हातमा गम्भीर क्षति पुगेको नगरप्रमुखले जानकारी दिनुभएको छ।

फ्रान्सको आन्तरिक मन्त्रालयका अनुसार पेरिस, मार्से, रेनेस, टुलुज र आन्जेसलगायत सहरमा नकाबधारी समूहले लक्षित रूपमा हिंसात्मक गतिविधि गरेका थिए। लिल सहरस्थित एप्पल स्टोरमा समेत तोडफोड गरी सामान लुटिएको जनाइएको छ।

फ्रान्सका माध्यमिक विद्यालयमा शिक्षक तथा कर्मचारीको अभाव र जीर्ण भौतिक संरचनाको विरोधमा विद्यार्थीहरूले पछिल्ला सातादेखि प्रदर्शन गर्दै आएका छन्। शनिबारको प्रदर्शनमा ट्रेड युनियनका सदस्य तथा बढ्दो जीवनयापन खर्चविरुद्ध आन्दोलन गर्दै आएको ‘येलो भेस्ट’ समूहका सदस्यसमेत सहभागी भएका थिए।

बढ्दो महँगी र सार्वजनिक सेवाको अवस्थालाई लिएर भएको प्रदर्शन आगामी राष्ट्रपतीय निर्वाचनको राजनीतिक वातावरणसँग पनि जोडिएको छ। राष्ट्रपति इम्यानुएल म्याक्रोंले आगामी वर्ष पद छाड्ने तयारी गरिरहेका बेला फ्रान्समा राजनीतिक अनिश्चितता बढिरहेको छ।

प्रधानमन्त्री लेकोर्नुले हिंसाको माध्यमबाट कसैले पनि आफ्नो राजनीतिक एजेन्डा अघि बढाउन नसक्ने बताउनुभएको छ। राष्ट्रपति म्याक्रोंले सरकारी कार्यालय, व्यवसाय र नगरपालिकामा तोडफोड तथा लुटपाट गर्नेहरूलाई कानुनी कारबाही गरिने चेतावनी दिनुभएको छ।

सरकारले विद्यालयमा शिक्षक अभाव कम गर्न ३ हजार अतिरिक्त अस्थायी शिक्षक उपलब्ध गराउने प्रतिबद्धता जनाए पनि प्रदर्शन रोकिएको छैन। पछिल्ला दिनमा आन्दोलन झन् चर्किएको जनाइएको छ।