जनता टाइम्स

३० कार्तिक २०८३, सोमबार ०८:४९

राइजिङ स्टार्स एसिया कप क्रिकेटमा भारत र पाकिस्तानसँग एउटै समूहमा नेपाल, सन्दीपको कप्तानीमा टोली घोषणा


काठमाडौं, कात्तिक ३०। भारत र पाकिस्तानका ‘ए’ टोलीसँग प्रतिस्पर्धा गर्ने चुनौतीसहित नेपालले कतारमा आयोजना हुने राइजिङ स्टार्स एसिया कप क्रिकेटमा खेल्ने आफ्नो टोली घोषणा गरेको छ। नेपाल क्रिकेट संघ (क्यान) ले सन्दीप लामिछानेको कप्तानीमा १५ सदस्यीय टोली सार्वजनिक गरेको हो।

नोभेम्बर १९ देखि २९ सम्म सञ्चालन हुने प्रतियोगितामा नेपालले भारत ‘ए’ र पाकिस्तान ‘ए’ जस्ता बलिया टोलीसँग समूह चरणमै प्रतिस्पर्धा गर्नुपर्नेछ। समूह ‘बी’ मा रहेको नेपालको समूहमा भारत ‘ए’, पाकिस्तान ‘ए’ र संयुक्त अरब इमिरेट्स (यूएई) छन्।

सन्दीपको कप्तानीमा घोषित टोलीमा बसिर अहमद, कुशल भुर्तेल, सन्दीप जोरा, देव खनाल, सोमपाल कामी, अर्जुन कुमाल, पवन सर्राफ, ईशान पाण्डे, ललित राजवंशी, दीपक डुम्रे, अभिशेष गौतम, रासिद खान, लोकेश बम र नन्दन यादव छन्।

प्रतियोगितामा नेपालको सहभागिता थप महत्त्वपूर्ण यसकारण पनि छ कि अन्य एसियाली क्रिकेट शक्तिहरूले दोस्रो रोजाइका टोली उतार्दा नेपालले राष्ट्रिय सिनियर टोलीका खेलाडीसमेत सहभागी गराउन पाउनेछ। भारत, पाकिस्तान, बंगलादेश र श्रीलंकाले आफ्ना ‘ए’ टोली मैदानमा उतार्नेछन् भने नेपाल, यूएई र हङकङले सिनियर राष्ट्रिय टोलीसमेत खेलाउन पाउने व्यवस्था छ।

नेपालले नोभेम्बर २० मा भारत ‘ए’ विरुद्ध खेल्दै प्रतियोगिताको सुरुवात गर्नेछ। नोभेम्बर २२ मा यूएई र नोभेम्बर २४ मा पाकिस्तान ‘ए’ सँग नेपालको प्रतिस्पर्धा हुनेछ। समूह चरणका तीन खेलले नेपालको सेमिफाइनल यात्राको टुंगो लगाउनेछन्।

अर्को समूह ‘ए’ मा बंगलादेश ‘ए’, श्रीलंका ‘ए’, अफगानिस्तान ‘ए’ र हङकङ छन्। दुवै समूहका शीर्ष दुई टोली सेमिफाइनलमा पुग्नेछन्। फाइनल खेल नोभेम्बर २९ मा हुनेछ।

नेपालले एसीसी प्रिमियर कपको उपाधि जितेर राइजिङ स्टार्स एसिया कपमा स्थान बनाएको हो। यही सफलतासँगै नेपाल एसिया कपका लागि पनि छनोट भएको थियो। प्रिमियर कपमा दोस्रो भएको यूएई र तेस्रो भएको हङकङले पनि प्रतियोगितामा स्थान बनाएका छन्।

सिनियर खेलाडीको अनुभव र युवा खेलाडीको ऊर्जालाई समेटेर घोषणा गरिएको नेपाली टोलीका लागि यो प्रतियोगिता एसियाली क्रिकेटका बलिया टोलीसँग आफ्नो क्षमता परीक्षण गर्ने अवसरसमेत हुनेछ।