काठमाडाैं, असार १२

राजस्व अनुसन्धन विभागले नक्कली स्टिकर प्रयोग गरी राजस्व चुहावट गरेको आरोपमा लुम्विनी पान मसला तथा सुर्ती गुट्खा उद्योगलाई ८७ करोड ५५ लाख ७४ हजार विगो र जरिवाना साथै ३ महिना कैद माग गर्दै मुद्दा दायरा गरेको छ । विभागले असार ११ गते बारा जिल्ला आदलतमा मुद्दा दायर गरेको हो ।

विभागले सुर्तिजन्य गुट्खामा अन्तःशुल्क ऐन विपरित स्टिकर नलगाई वा कुनैमा नक्कली स्टिकर प्रयोग गरी वितरक तथा थोक विक्रेता समेतको मिलेमतोमा राजस्व चुहावट गरेको उल्लेख गरेको छ ।
उद्योगले २९ करोड १८ लाख ५८ हजार राजस्व चुहावट गरेको र सो को देब्बर सम्म जरिवाना ५८ करोड ३७ लाख १६ हजार गरी कुल ८७ करोड ५५ लाख ७४ हजार विगो र जरिवानाको दाबी गर्दै मुद्दा हालेको हो ।

लुम्विनी पान मसला तथा सुर्ती गुट्खा उद्योगबाट उत्पादित पानकिङ्ग गुट्खा विक्री गर्नसाईन ट्रेडर्सबाट बालाजी मार्केटिङलाई विक्री गरेको 400 बोरा पानकिङ गुट्खा लोड भएको ना ३ ख ९९३३ नम्बरको ट्रक चेकजाँच गर्दा २४ हजार पाउचमा नियमानुसार अन्तःशुल्क टिकट टाँस नभएको अवस्थामा रहेको, ३ हजार ८ सय ६८ पाउचमा आन्तरिक राजस्व विभागको ७० एम एम फिल्टर चुरोटमा प्रयोग हुने अन्तःशुल्क टिकट टाँस भएको र बाँकी ४१३२ पाउचमा आन्तरिक राजस्व विभागको खैनी/गुट्खा/पानमसलामा टाँस गर्ने अन्तःशुल्क टिकट टाँस गरेको अवस्थामा बरामद भएको उल्लेख गरेको छ ।

विभागले अन्तःशुल्क टिकट टाँस गरी अन्तःशुल्क लाग्ने बस्तु विक्रि गर्नु पर्ने व्यवस्था गरेकोमा बरामद भएको मालबस्तुमध्ये २४ हजार पाउच पानकिङ गुट्खामा अन्तःशुल्क टिकट टाँस नभएको जनाएको छ ।