११ भाद्र २०७६, बुधबार ००:००

मन्त्रीकै गाडीमा ट्राफिक प्रहरीले लगायो ह्वील लक


काठमाडौं, भदौं ११ । ट्राफिक नियम मिचेपछि काठमाडौंको नयाँ बानेश्वरमा भौतिक पूर्वाधार तथा यातायातमन्त्री रघुवीर महासेठका सवारी चालकलाई ट्राफिक प्रहरीले कारवाही गरेको छ । मन्त्रीको झण्डावाल गाडी बा २ झ ४८६२ नम्बरको गाडीले ट्राफिक नियम मिचेपछि ट्राफिक प्रहरीले ह्वील लक लगाएर कार्वाही गरेको हो ।

घटना सार्वजनिक भएपछि ट्राफिक प्रहरीले चालकलाई जथाभावी पार्किङ गरेको भन्दै कारवाही गरेको हो । महानगरीय ट्राफिक प्रहरी मशाशाखाका प्रमुख एसएसपी बशन्त पन्तले मन्त्रीका चालक शीवराम थापालाई कारवाही गरेको बताउनुभयो । जथाभावी पार्किङ गरेकोमा चालकलाई एक हजार जरिवाना गर्ने व्यवस्था रहेको एसएसपी पन्तको भनाई छ । घटनासँगै नियम विपरित यातायात साधन पार्किङ गर्ने र नियम नमान्नेहरु जोकोही भएपनि ट्राफिक प्रहरीले नछाड्ने नीति लिएको पन्तले प्रष्ट पार्नुभयो ।

पैदलयात्रु हिड्ने बाटो बढी मिचेर गाडी रोकिएपछि पैदलयात्रु मारमा परेका थिए । तर उक्त समयमा मन्त्री भने गाडीमा नरहेको प्रहरीले जनाएको छ । ट्राफिक नियम मिचेको देखेपछि नयाँ बानेश्वर क्षेत्रमा ह्वील लक बोकेर हिडेका ट्राफिक प्रहरीले ह्वील लक लगाएका थिए ।ट्राफिक प्रहरीको यस्तो कदमको सर्वसाधरणले खुलेर प्रशंसा गरेका छन । ट्राफिक प्रहरीले मन्त्रीको झण्डावाल गाडी चिन्दाचिन्दै पनि ह्वील लक लगाएका थिए । ‘सवैलाई नियम कानून बरावर हो भन्ने गतिलो प्रमाण हो यो,’ पैदलयात्रीहरुको भनाई थियो ।

तस्विर सौजन्य : नागरिक खवर