भक्तपुर, जेठ ६ । नेकपा एमाले भक्तपुरको अध्यक्षमा बचनबहादुर देउजा निर्वाचित हुनुभएको छ । नवौं जिल्ला अधिवेशन अन्तर्गत भएको निर्वाचनको आज बिहान सम्पन्न मतगणना परिणामअनुसार देउजा ८९ मतको अन्तरमा अध्यक्षमा निर्वाचित हुनुभएको हो ।

अधिवेशनमा देउजाले प्रतिस्पर्धी मोहनबीर श्रेष्ठलाई पराजीत गर्नुभएको हो । देउवाले २९० मत र श्रेष्ठले २०१ मत पाउनु भएको छ । देउजा दोस्रो कार्यकालका लागि निर्वाचित हुनुभएको हो । यस्तै उपाध्यक्षमा किरण थापा, सचिवमा बिष्णु लामा, उपसचिवमा सानुकाजी कायस्थ र उत्तरा नेपाल निर्वाचित हुनुभएको छ ।

उपाध्यक्षमा बिजयी बागमति प्रदेश सांसद किरणले सूर्यबिनायक नगरपालिकाका मेयर बाशुदेव थापालाई पराजीत गर्नुभएको हो । किरणले २६२ मत पाउँदा पराजीत बाशुदेवले २२९ मत पाउनु भएको छ ।

यस्तै सचिवमा बिजयी तामाङले २७५ मत पाउँदा शम्भुप्रसाद दाहालले २१६ मत, उपसचिवमा बिजयी उत्तराले २१८ मत पाउँदा पराजीत सुचित्रा श्रेष्ठ प्रधानाङ्गले २०७ मत र जुना बस्नेतले ६६ मत पाउनु भएको छ ।

यस्तै उपसचिव खुलातर्फ बिजयी सानुकाजी कायस्थले २५४ मतसहित बिजयी बन्दा राजकुमार जोशीले २३७ मत पाउनु भएको छ । भक्तपुरमा खुल्ला सदस्यतर्फ पनि निर्वाचन भएको छ ।