काठमाडौं, भदौ १६ । नेकपा माओवादी केन्द्र निकट नेपाल राष्ट्रिय निर्माण व्यवसायी संगठनका केन्द्रीय सचिव इञ्जिनियर कृष्णदेव यादव नेकपा एमालेमा प्रवेश गर्नुभएको छ ।

निर्माण व्यवसायी संघ रौतहट जिल्ला अध्यक्ष समेत रहनुभएका यादव शनिबार नेकपा एमालेमा प्रवेश गर्नुभएको हो । एमाले केन्द्रीय कार्यालय च्यासलमा आयोजित कार्यक्रममा एमाले महासचिव शंकर पोखरेल लगायतका नेताहरूले यादवलाई पार्टीमा स्वागत गर्नुभयो ।

कार्यक्रममा नेकपा एमाले स्थायी कमिटी सदस्य एवं जनसंगठन समन्वय संयन्त्रका संयोजक भानुभक्त ढकाल लगायतका एमाले नेताहरूको सहभागिता रहेको थियो । एमाले प्रवेश गरेपछि आफ्नो भनाई राख्दै यादवले माओवादी पतनको डिलमा पुगेको र एमाले मात्रै सच्चा कम्युनिष्ट पार्टी रहेको कारण प्रवेश गरेको बताउनु भयो ।