झापा, २८ जेठ । राजस्थानको टोंक जिल्लामा मंगलबार दिउँसो बनास नदीमा डुबेर आठ साथीको मृत्यु भएको छ। टोंक जिल्लाको सदर प्रहरी चौकी क्षेत्रको पुराना बनस पुलिया नजिकै भएको यो घटनाको जानकारी पाउने बित्तिकै प्रहरी र उद्धार टोली घटनास्थलमा पुगेको थियो। घटनाको बारेमा जयपुर प्रहरीलाई जानकारी गराइएको थियो।

टोंक जिल्लाका प्रहरी उपरीक्षक (एसपी) विकास सांगवानले फोनमा बीबीसी हिन्दीलाई भने, “११ जना युवा थिए जसमध्ये तीन जनालाई उद्धार गरिएको छ। आठ जना युवाको डुबेर मृत्यु भएको छ। ती सबै जयपुरका बासिन्दा थिए।”

घटनाप्रति दुःख व्यक्त गर्दै पूर्व मुख्यमन्त्री अशोक गहलोतले आफ्नो एक्स अकाउन्टमा लेखे , “प्रशासन र सरकारले भविष्यमा यस्ता घटनाहरू दोहोरिन नदिने कुरा सुनिश्चित गर्नुपर्छ।”

टोंकका विधायक तथा पूर्व उपमुख्यमन्त्री सचिन पाइलटले आफ्नो एक्स अकाउन्टमा लेखेका छन् , “टोंक घुम्न आएका जयपुरका केही युवाको बनास नदीमा डुबेर मृत्यु भएको खबर अत्यन्तै दुखद र हृदयविदारक छ।”

“यस दुर्घटनामा ज्यान गुमाउने युवाहरूका परिवारप्रति म गहिरो समवेदना व्यक्त गर्दछु। भगवानले उनीहरूलाई यो पीडा सहन सक्ने शक्ति प्रदान गरून्।”