काठमाडौं, असार १६ । चार पटकको विजेता जर्मनीलाई स्तब्ध पार्दै पाराग्वे फिफा विश्वकप २०२६ को अन्तिम १६ मा पुगेको छ।

अमेरिकाको बोस्टन स्टेडियममा मंगलबार बिहान भएको खेलमा पाराग्वे पेनाल्टी सुटआउटमा जर्मनीलाई स्तब्ध पार्दै अन्तिम १६ मा पुगेको हो। राउण्ड अफ ३२ को खेलमा दक्षिण अमेरिकी राष्ट्र पाराग्वेले जर्मनीलाई सडनडेथमा ४-३ ले पराजित गरेको हो।

पाराग्वेका लागि जोसे क्यानालेले निर्णायक पेनाल्टी प्रहार गोल गरेका हुन्। निर्धारित ९० मिनेट र ३० मिनेटको अतिरिक्त समयमको खेल १(१ को बराबरीमा सकिएपछि खेलको नतिजा पेनाल्टी सुटआउटबाट भएको हो। जारी विश्वकपमा पेनाल्टी सुटआउटबाट निर्णय भएको यो पहिलो खेल हो।

पाराग्वेल अब फ्रान्स र स्वीडेनबीचको विजेतासँग अन्तिम १६ मा खेल्नेछ। जर्मनी जारी विश्वकपबाट बाहिरिने दोस्रो पूर्वविजेता बनेको छ। यसअघि उरुग्वे समूह चरणबाटै बाहिरिसकेको छ।

सुरुवाती पाँच पेनाल्टी प्रहारमा दुवै टिमका गोलकिपरले दुई(दुई पेनाल्टी बचाउँदा ३-३ को बराबरी भएको थियो। त्यसपछि छैटौं पेनाल्टी प्रहार गरेका जर्मनीका ताहको प्रहार पोस्टमाथिबाट बाहिरियो। त्यसपछि जोसे कानालेले पाराग्वेका लागि निर्णायक पेनाल्टी गोलमा परिणत गरे।

यसअघि निकै प्रतिस्पर्धात्मक खेलमा जुलियो इनसिसोले ४२औं मिनेटमा गोल गर्दै पाराग्वेलाई पहिले अग्रता दिलाएका थिए भने काई हाभार्टले ५४औं मिनेटमा जर्मनीका लागि बराबरी गोल फर्काएका थिए।