काठमाडौं, कात्तिक ३ । शारदीय नवरात्रको नवौँ दिन आज नवदुर्गाको अन्तिम स्वरूप देवी सिद्धिदात्रीको विशेष पूजा आराधना गरिँदै छ। महानवमीका अवसरमा देशभरका देवी मन्दिर तथा शक्तिपीठमा भक्तजनले विधिपूर्वक पूजा, मन्त्रजप र ध्यान गरिरहेका छन्।

धार्मिक मान्यताअनुसार देवी सिद्धिदात्रीलाई सम्पूर्ण सिद्धि प्रदान गर्ने देवीका रूपमा पूजा गरिन्छ। उहाँको आराधना गरेमा मनोकामना पूरा हुनुका साथै घरपरिवारमा सुख, शान्ति र समृद्धि प्राप्त हुने विश्वास छ।

धार्मिक वर्णनअनुसार कमलको फूलमा विराजमान देवी सिद्धिदात्रीका चार हातमा शङ्ख, चक्र, गदा र कमल छन्। यस दिन भक्तजनले बिहानै स्नान गरी देवीको पूजा, मन्त्रजप, ध्यान तथा स्तोत्र पाठ गर्ने परम्परा छ। देवीलाई रातो फूल, नरिवल र मिठाई चढाएर आरती गर्ने तथा प्रसाद वितरण गरिन्छ।

पौराणिक मान्यताअनुसार देवी सिद्धिदात्रीकै कृपाबाट भगवान् शिवले सिद्धि प्राप्त गर्नुभएको थियो। उहाँकै अनुग्रहबाट शिव अर्धनारीश्वर स्वरूपमा प्रकट हुनुभएको धार्मिक विश्वास छ।

देवी सिद्धिदात्रीको श्रद्धापूर्वक आराधना गरेमा दुःखकष्टबाट मुक्ति, आध्यात्मिक उन्नति तथा मोक्ष प्राप्त हुने जनविश्वास रहेको छ।