काठमाडौं, कात्तिक ५ । नेपालले आईसीसी मेन्स क्रिकेट विश्वकप क्वालिफायर प्लेअफ आयोजना गर्ने भएको छ। क्रिकेट एसोसिएसन अफ नेपाल (क्यान) का अनुसार प्रतियोगिता आगामी डिसेम्बर ४ देखि २१ सम्म नेपालमा सञ्चालन हुनेछ।

सन् २०२७ मा आयोजना हुने आईसीसी मेन्स क्रिकेट विश्वकपमा पुग्ने सम्भावना कायम राख्न नेपालका लागि यो प्रतियोगिता महत्त्वपूर्ण हुनेछ। घरेलु मैदानमा खेल्ने अवसर पाएको नेपालले राम्रो प्रदर्शन गर्दै मुख्य विश्वकप क्वालिफायरमा स्थान बनाउने लक्ष्य राख्नेछ।

प्रतियोगितामा आठ टोली सहभागी हुनेछन्। तीमध्ये शीर्ष चार टोली मुख्य आईसीसी मेन्स क्रिकेट विश्वकप क्वालिफायरमा प्रवेश गर्नेछन्। लिग–२ मा शीर्ष चारभित्र पर्न नसकेपछि नेपालले मुख्य क्वालिफायरमा सिधै स्थान बनाउन सकेन। अब क्वालिफायर प्लेअफमा शीर्ष चारभित्र पर्न सके नेपालले विश्वकप छनोटको अर्को चरणमा पुग्ने अवसर पाउनेछ।

यस प्रतियोगितामा आईसीसी क्रिकेट विश्वकप लिग–२ का तल्लो चार टोली र विश्वकप च्यालेन्ज लिगका शीर्ष चार टोलीबीच प्रतिस्पर्धा हुनेछ। लिग–२ का नेपाल, क्यानडा, संयुक्त अरब इमिरेट्स (यूएई) र नामिबिया तथा ओमानमध्ये लिग–२ को अन्तिम वरीयताअनुसार बाँकी रहने टोलीको सहभागिता रहनेछ।

नेपालमै प्रतियोगिता आयोजना हुनुले घरेलु समर्थकको साथ र परिचित मैदानको फाइदा उठाउने अवसर मिल्नेछ। त्यसैले नेपालका लागि यो प्रतियोगिता विश्वकप छनोटको सम्भावना जीवित राख्ने महत्त्वपूर्ण अवसरका रूपमा रहनेछ।

क्वालिफायर प्लेअफले विश्वकप छनोटको अर्को चरणमा पुग्ने टोलीको टुङ्गो लगाउनुका साथै लिग–२ र च्यालेन्ज लिगबीचको बढुवा तथा घटुवाको समीकरणमा समेत महत्त्वपूर्ण भूमिका खेल्नेछ। डिसेम्बर ४ देखि २१ सम्म सञ्चालन हुने प्रतियोगिताले नेपालको विश्वकप यात्रामा निर्णायक प्रभाव पार्न सक्छ।