जनता टाइम्स

६ जेष्ठ २०७७, मंगलबार ००:००

अमेरिकामा कोरानाविरुद्धको खोप परीक्षणको नतिजा सकारात्मक, जनवरीसम्म बजारमा ल्याउन सकिने


काठमाडौं, जेठ ६ । बिश्वभर महामारीको रुप लिएको कोरोना भाइरस (कोभिड १९) विरुद्ध अमेरिकामा गरिएको खोपको परीक्षणले केही सकारात्मक परिणाम देखाएको छ ।

अमेरिकाको मोडिरिना कम्पनीले विकास गरिरहेको कोभिड १९ खोपको परीक्षणको प्रारम्भिक परिणाम सकारात्मक देखिएको हो । सिएनएनले जनाएअनुसार आगामी अध्ययन राम्रो गयो भने कम्पनीले जनवरीको शुरुतिर आम उपभोक्तासमक्ष कोरोनाबिरुद्धको खोप ल्याउन सक्ने अध्ययनमा संलग्न वैज्ञानिकहरुले बताएका छन् ।

यो प्रारम्भिक परिणाम क्लिनिकल परीक्षणको पहिलो चरणमा देखिएको हो । यसमा सानो सङ्ख्यामा मानिसमा यो खोप सुरक्षित छ कि छैन भनेर गरिएको थियो । परीक्षण परिणामलाई अमेरिकाको नेशनल इन्ष्टिच्युटले समीक्षा गर्नुका साथै मेडकल जर्नलमा प्रकाशित गरेको छ । खोप विकासमा लागेको म्यासाच्युसेटको क्याम्ब्रिजमा रहेको मोडिरिना कम्पनी विश्वमा कोभिड १९ विरुद्धको खोप निर्माणमा लागेका आठ कम्पनी मध्येको एक हो ।

यो कम्पनीले दर्जनौँ व्यक्तिलाई खोप लगाएको र त्यसमध्ये आठ जनामा एन्टिबडी मापन गरिएकोमा आठै जनामा भाइरसले पैदा गर्ने एन्टिबडीलाई कोराना सङ्क्रमणबाट निको भएका व्यक्तिको शरीरमा रहेको एन्टिबडीको स्तरमा रहने गरी निष्कृय बनाएको पाइएको थियो । वैज्ञानिकहरूले यो सफलतालाई ठूलो सफलताको संज्ञा दिएका छन ।