काठमाडौं, जेठ २१

भारतबाट आउने नागरिकमा कोरोनाको संक्रमण बढ्दो रुपमा देखिन थालेपछि सरकारले एकैपटक धेरै परीक्षण गर्न मिल्ने पिसिआर मेसिन खरिद गर्ने भएको छ । सरकारले सोचे भन्दा भिन्नै रुपमा संक्रमित धमाधम नेपाल आउन थालेपछि दैनिक १५ सय परीक्षण गर्न सक्ने केही मेसिन किन्ने तयारी गरेको हो ।

हाल देशभर रहेका २० वटा प्रयोगशालाले कोरोनाको करिव २५ सय परीक्षण गर्दै आएको छ । नयाँ मेसिन खरिद गरेपछि दैनिक १० हजार जनाको पिसिआर प्रविधिबाट परीक्षण गर्ने तयारी भईरहेको स्वास्थ्य मन्त्रालय स्रोतले जानकारी दिएको छ । मन्त्रालयका प्रवक्ता डा. विकास देवकोटाले पनि नयाँ मेसिन किन्न लागेको जानकारी दिनुभयो । उहाले परीक्षणको दायरा अझै फराकिलो बनाउनका लागि मेसिन खरिद प्रक्रिया शुरु भएको बताउनु भयो ।

त्यसका लागि स्वास्थ्य मन्त्रालयले टेकुस्थित राष्ट्रिय जनस्वास्थ्य प्रयोगशालालाई कस्ता र कति वटा मेसिन थप्ने हो भनेर सिफारिस गर्न भनेको छ । प्रयोगशालाकी निर्देशक डा. रूना झाले सकेसम्म आज नै कस्तो र कति क्षमताको मेसिन ल्याउने भन्ने मन्त्रालयलाई सिफारिस गरिने जानकारी दिनुभयो । निर्देशक झाले मन्त्रालयलाई पाँच वटा ठूला आरटी पिसिआर मेसिन खरिद गर्न सुझाउन लागेको बताउनु भयो । सो प्रयोगशालाले सुझाउने नयाँ पिसिआर मेसिनले दैनिक १५ सय परीक्षण गर्नसक्ने जनाउनु भयो ।

पाँच वटा मेसिन खरिद गर्न सके देशका मुख्य मुख्य शहरमा राखेर दैनिक ७ हजार ५ सय जनाको परीक्षण गर्नसक्छ । यसरी थप पाँच वटा ठूला क्षमताको मेसिन आए दैनिक १० हजार जनामा परीक्षण गर्न सकिन्छ । तेस्रो मुलुकबाट पनि नेपालीलाई उद्धार गरेर ल्याउने तयारी भईरहेका बेला सो मेसिन आवश्यक पर्ने मन्त्रालयको पनि बुझाई रहेको छ ।