महोत्तरी, कात्तिक २९। नेकपा एकीकृत समाजवादी महोत्तरीका अध्यक्ष कौशिलाल यादवसहितका दर्जनौँ नेताहरू नेकपा एमालेमा फर्कनु भएको छ ।

महोत्तरीको रामगोपालपुरमा मंगलवार एमाले क्षेत्रीय समन्वय समितिले दसैँ, दीपावली तथा छठ पर्वको अवसरमा आयोजना गरेको शुभकामना आदानप्रदान कार्यक्रममा एमाले बरिष्ठ उपाध्यक्ष ईश्वर पोखरेलले यादवसहितका नेता कार्यकर्तालाई पार्टीमा स्वागत गर्नुभएको हो ।

पोखरेलले यादवलाई फूलमाला र अबिर लगाएर पार्टीमा स्वागत गर्नुभयो । यादवसहितका नेताहरुले नेकपा एकीकृत समाजवादीको औचित्य सकिएको निश्कर्षसहित आफूहरु एमालेमा फर्किएको बताउनु भयो ।

यादवसँगै नेकपा एसका जिल्ला सचिव अरुण कुमार चौधरी, भंगहा नगरपालिकाका नगर कमिटी अध्यक्ष किशोरी सिंह लगायत नेता कार्यकर्ताहरू पनि एमालेमा फर्कनुभएको छ ।

यस्तै नेकपा माओवादी केन्द्र मधेस प्रदेश कमिटी सदस्य बैजनाथ यादव पनि एमालेमा प्रवेश गर्नुभयो । यादवको नेतृत्वमा माओवादीका १४ कार्यकर्ता पनि एमालेमा प्रवेश गर्नुभएको छ ।