काठमाडौं, २४ असार। सत्तारूढ राष्ट्रिय स्वतन्त्र पार्टी (रास्वपा) ले प्रतिनिधिसभामा शून्य समय तथा विशेष समयमा आफ्ना माननीय सांसदहरूले प्रस्तुत गर्ने विषयवस्तु एक दिनअघि नै पार्टीका सचेतकसमक्ष उपलब्ध गराउन अनुरोध गरेको छ। उक्त व्यवस्थापछि सांसदहरूको अभिव्यक्ति स्वतन्त्रता र संसदीय अभ्यासबारे नयाँ बहस सुरु भएको छ।

पार्टीका सचेतकद्वय माननीय क्रान्तिशिखा धिताल र माननीय प्रकाशचन्द्र परियारले सांसदहरूलाई पठाउनुभएको सर्कुलरमा शून्य समय तथा विशेष समयमा प्रस्तुत गरिने भाषण वा नोट्स एक दिनअघि नै उपलब्ध गराइदिन अनुरोध गरिएको छ। साथै, प्रतिनिधिसभाको बैठकमा सांस्कृतिक पोसाकबाहेक अन्य पोसाकमा उपस्थित हुने माननीय सदस्यहरूले अनिवार्य रूपमा कोट तथा पार्टीको लोगो प्रयोग गर्नुपर्ने उल्लेख गरिएको छ।

यस व्यवस्थाप्रति केही माननीय सांसदहरूले असन्तुष्टि जनाउनुभएको छ। उहाँहरूको भनाइमा यसले संसद्मा स्वतन्त्र रूपमा धारणा राख्ने अभ्यासमा प्रभाव पार्न सक्ने चिन्ता व्यक्त गरिएको छ।

यद्यपि रास्वपाका सचेतक माननीय प्रकाशचन्द्र परियारले भने सांसदहरूको विशेषाधिकार वा वाक् स्वतन्त्रतामा कुनै अंकुश लगाउने उद्देश्य नभएको स्पष्ट पार्नुभएको छ। उहाँका अनुसार संसद्मा उठाइने विषयवस्तु अझ तथ्यपरक, व्यवस्थित र परिणाममुखी बनाउने उद्देश्यले मात्र पूर्वतयारीका लागि सामग्री मागिएको हो, पूर्वस्वीकृति लिनुपर्ने व्यवस्था गरिएको होइन।

यो सर्कुलर केही दिनअघि रास्वपाका केही माननीय सांसदहरूले प्रतिनिधिसभा तथा सामाजिक सञ्जालमार्फत सरकारको कार्यसम्पादनप्रति सार्वजनिक रूपमा असन्तुष्टि व्यक्त गर्नुभएपछि जारी गरिएको हो। पार्टीले सांसदहरूलाई संसदीय मर्यादा, प्रस्तुति र प्रभावकारी अभिव्यक्तिबारे प्रशिक्षणसमेत दिएको जनाएको छ।

नेपालको संविधानको धारा १०३ ले संघीय संसद्का दुवै सदनका सदस्यलाई पूर्ण वाक् स्वतन्त्रताको प्रत्याभूति गरेको छ। यस्तो अवस्थामा सांसदहरूले संसद्मा बोल्नुअघि आफ्नो सामग्री पार्टीका सचेतकलाई पठाउनुपर्ने व्यवस्थाले संसदीय अभ्यास, दलगत अनुशासन र अभिव्यक्ति स्वतन्त्रताबीचको सन्तुलनबारे बहसलाई थप तीव्र बनाएको छ।